შვეიცარიაში მკვლელობისთვის სასჯელმოხდილი პირი პუტინის პარტიული სიით ვლადიკავკაზის საკრებულოს წევრი გახდა

მსოფლიო - 17:54, 09 Sep, 2019

1174

რუსეთში გუშინ ადგილობრივი ხელისუფლების ორგანოების არჩევნები ჩატარდა.

ვლადიმერ პუტინის პარტიის, "ედინაია როსიას" პარტიული სიით ჩრდილოეთ ოსეთის დედაქალაქის, ვლადიკავკაზის საკრებულოს წევრი ვიტალი კალოევი გახდა, რომელსაც შვეიცარიაში ავიაკომპანია Skyguide-ის დისპეჩერის მკვლელობის გამო პატიმრობა მიუსაჯეს.

"მე მომწონს ვლადიკავკაზი და ხალხი, რომელიც იქ ცხოვრობს. მე მინდა ქალაქი უკეთესი და უფრო ლამაზი გავხადო, რომ ხალხს გაუხარდეს," - განუცხადა კალოევმა РИА Новости-ს.

კალოევმა დისპეჩერი პეტერ ნილსენი შურისძიების გამო მოკლა. 2005 წელს დისპეჩერის უყურადღებობის გამო, ბოდენის ტბის თავზე, ერთმანეთს "ბაშკირეთის ავიახაზების" Ту-154-ი და DHL-ის სატვირთო ბოინგი შეეჯახა. ავიაკატასტროფამ 71 ადამიანი იმსხვერპლა, მათ შორის კალოევის მეუღლე და 2 შვილი.

შვეიცარიის სასამართლომ კალოევს 8 წელი მიუსაჯა, თუმცა, 2007-ში ის ციხიდან პირობით ვადამდე ადრე გაათავისუფლეს. 2008 წელს კალოევი ჩრდილოეთ ოსეთის მშენებლობისა და არქიტექტურის მინისტრის მოადგილედ დაინიშნა.

ბოდენის ტბის ინციდენტზე გადაღებულია ფილმი "შედეგები", რომელშიც მთავარ როლს არნოლდ შვარცნეგერი ასრულებს.