"მთავრობა უნდა ყოფილიყო თავიდანვე მობილიზებული აქ და ეს ამბავი არ მოხდებოდა...ვართ უყურადღებოდ, ღმერთის იმედად"

"მთავრობა უნდა ყოფილიყო თავიდანვე მობილიზებული აქ და ეს ამბავი არ მოხდებოდა...ვართ უყურადღებოდ, ღმერთის იმედად" - გუგუტიანთკარელები

საზოგადოება - 15:39, 17 Aug, 2019

603

გუგუტიანთკარის მოსახლეობა კვლავ ოკუპაციის მოლოდინშია - საოკუპაციო ზოლს მიღმა მოექცა წყლის რეზერვუარიც, რომლიდანაც სოფელი მარაგდება. ადგილობრივების ნაწილი მედიასთან კონტაქტს ერიდება. პირად საუბრებში გგუტიანთკარელები ამბობენ, რომ მათ გაჩუმება ხელისუფლების წარმომადგენლებმა სთხოვეს, სანაცვლოდ კი დახმარებას დაჰპირდნენ.

თუმცა დღეს სოფელში არც ცენტრალური და არც ადგილობრივი ხელისუფლების წარმომადგენლები არ გამოჩენილან.

სოფლის მცხოვრებლების ის ნაწილი ვინც მედიასთან ღიად საუბრობს, მომხდარში ხელისუფლებას ადანაშაულებს. ადგილობრივები ამბობენ, რომ მათი ბედით უკვე დიდი ხანია აღარავინ დაინტერესებულა. ისინი ეჭვობენ, რომ ოკუპაცია გაგრძელდება და რუსი ჯარისკაცების კონტროლქვეშ, დანარჩენი სოფელიც მალე მოექცევა.

„საქართველოს ხელისუფლებაა დამნაშავე, მეტი არაფერი. იმიტომ, რომ მთავრობა უნდა ყოფილიყო თავიდანვე მობილიზებული, ყოფილიყო აქ და ეს ამბავი არ მოხდებოდა. პირადად მე და ჩვენი სოფელი ყურადღებას ვერ ვგრძნობთ. არის უყურადღებობა და ხალხის აბუჩად აგდება.

გორის მერი შვებულებაში იქნება, ბევრი საქმე გააკეთა და ხომ უნდა დაისვენოს. რომ მუშაობს მაშინაც ხომ არაფერს აკეთებს და ისვენებს და ახლაც დაისვენოს. არც გორის მერს გაუკეთებია არაფერი, არც საკრებულოს გაუკეთებია, არც გუბერნატორს გაუკეთებია, არავის საერთოდ, ვართ უყურადღებოდ ღმერთის იმედად.

ეს ოკუპაცია ყველა ვარიანტში, ამ მთავრობის ხელში გაგრძელდება, აგერ ნახავთ ,“-ამბობს სოფელ გუგუტიანთკარის მცხოვრები გიორგი გნოლაძე.