დღეს,დაბა აგარაში, 19:00 საათზე, მასშტაბური საპროტესტო აქცია გაიმართება. "ნიუპოსტის" კორესპინდენტის ცნობით,

აგარის შაქრის ქარხნიდან გათავისუფლებული 500-მდე თანამშრომელი საწარმოს ამუშავებას და დასაქმებას ითხოვს.

„მარტში გაგვათავისუფლეს სამსახურიდან გადაგვიხადეს ოთხი თვის კომპენსაცია და გვითხრეს რომ ქარხანა კონკურენტუნარიანი არ არის, შეგვპირდნენ რომ ნედლეულის ფასი დაწევისთანავე მუშაობას განვაახლებდით. ნედლეულის ფასი ბაზარზე დაწეულია, მაგრამ ჩვენ აღარავინ გვამუშავებს. სამსახურის გარეშე დაახლოებით 500 ადგილობრივი დავრჩით. ეს იქნება საინფორმაციო ხასიათის აქცია, პროტესტის შემდეგ ეტაპებს თანდათან გავივლით. ამ დროისთვის ჩამოყალიბებულები არ ვართ რა ფორმით გავაგრძელებთ აქციებს," - განაცხადა ქარხნიდან გათავსუფლებულმა თანამშრომელმა ზაზა არბოლიშვილმა.

შაქრის ქარხნიდან გათავისუფლებულების საქმეში ჩართულია პროფკავშირებიც.

„ჩვენ ვდგავართ აქციის მონაწილეების გვერდით. ქარხნის ადმინისტრაცია აცხადებს, რომ ნედლეულის შემოტანა ძვირი უჯდება, რის გამოც იძულებულები არიან მუსაობა შეაჩერონ,"- აცხადებს პროფკავშირების წარმომადგენელი გიორგი დიასამიძე.

აგარის შაქრის ქარხნიდან თანამშრომლები ანალოგიური მიზეზით გასულ წელსაც გაათავისუფლეს, რამდენიმეთვიანი საპროტესტო აქციისა და მსვლელობის შემდეგ, ისინი სამსახურში აღადგინეს.