რკინიგზის 4800 თანამშრომელი ხელფასის 50%-ით მომატებას ითხოვს და გაფიცვებს აანონსებს. რკინიგზელთა ახალი პროფკავშირის წარმომადგენლები აცხადებენ, რომ რკინიგზის ადმინისტრაციამ უარი განაცხადა მოლაპარაკებებზე და მათ მხოლოდ ერთი გზა - გაფიცვა და საპროტესტო აქცია.

პროფკავშირების წარმომადგენლები აცხადებენ, რომ ქვეყანაში სოციალური მდგომარეობა გაუარესებულია და სამომხმარებლო კალათა, რაც პირველად მოხმარების პროდუქტებს გულისხმობს, გაძვირებულია. პროფკავშირებში ამბობენ, რომ რკინიგზაში დასაქმებულებს საკუთარი ხელფასები ელემენტარული საკვების შესაძენადაც გაჭირვებით ყოფნით.

„2012 წლიდან რკინიგზელებს ხელფასები არ მომატებიათ. აქედან გამომდინარე რკინიგზელები ითხოვენ ხელფასის 50%-ით მომატებას,“ - განაცხადა რკინიგზელთა ახალი პროფკავშირის წევრმა თენგო დვალიშვილმა.

მასშტაბური აქციების დაგეგმვა 10 აგვისტოს დაიწყება. ამის შემდეგ გახდება ცნობილი რამდენი დღე გაგრძელდება გაფიცვა. იმ შემთხვევაში თუ საპროტესტო აქციები დაიწყება, ეს ავტომატურად გამოიწვევს შიდა და გარე მიმოსვლების შეჩერებას.

„პროფკავშირს გვაქვს შემუშავებული გეგმა, როგორ შეიძლება ეს მოხერხდეს. რკინიგზის ადმინისტრაციისთვის ვიყავით მზად, რომ შეგვეთავაზებინა ეს გეგმა. დავიწყეთ მედიაციის პროცესი. დაინიშნა მინისტრის წარმომადგენელი, თუმცა, რკინიგზის ადმინისტრაციამ უარი განაცხადა მოლაპარაკებებზე. ამ ეტაპზე 4800 ადამიანი არის ჩართული ამ პროცესში ხელი აქვს მოწერილი კონკრეტულად საგაფიცო პროცედურების დაწყების მოთხოვნაზე. პროფკავშირებს ერთადერთი ისღა დაგვრჩენია, რომ ეს პროცედურები ჩავსვათ კანონის ფარგლებში, რომ გაფიცვა იყოს კანონიერი.,“-განაცხადა რკინიგზელთა ახალი პროფკავშირის წევრმა ილია ლეჟავამ.