პროსტიტუცია და ტყვეობა ქორწინების ნაცვლად

მსოფლიო - 18:22, 30 Jul, 2019

3230

ივლისის განმავლობაში პაკისტანის პოლიციამ 20-მდე ჩინეთისა და ათულობით პაკისტანის მოქალაქე დააკავა ტრეფიკინგის ბრალდებით. ეს პირები იმ დანაშაულებრივი დაჯგუფებების წევრები იყვნენ, რომლებიც ქალების ვაჭრობით იყვნენ დაკავებული. ისინი პაკისტანელ, ძირითადად, ღარიბ ქრისტიან ქალებს პირდებოდნენ ჩინეთში საცხოვრებლად გადაყვანას და მორიგებით გათხოვებას.

დაკავების პროცესში ჩართული იყვნენ მოხალისე ქრისტიანული საქველმოქმედო ორგანიზაციებიც. მათი მონაცემით ამ კატეგორიის ქალთა რიცხვი ათასს აღემატება.

გათხოვება და ქორწინების რიტუალი ქალების ტყვეობითა და მათი პროსტიტუციაში ჩართვით მთავრდებოდა. დანაშაულებრივი სქემა მას შემდეგ გაიხსნა, რაც რამდენიმე გოგონას მშობლებმა, რომლებიც შვილებს ჩინეთში ვეღარ უკავშირდებოდნენ, პაკისტანში ხმაური ატეხეს და შესაბამის ორგანოებს მიმართეს.

ერთერთი ტყვეობიდან დახსნილი გოგონას ინფორმაციით, დაქორწინების შემდეგ ჩინელმა "ქმარმა" ის სხვა მამაკაცს მიყიდა, რომელმაც გოგონას პასპორტი წაართვა და განუცხადა, რომ ის გაქცევას ვერ შესძლებდა, რადგან ის მისი "ნაყიდი" საკუთრება იყო.

"მან ჩემზე ძალა იხმარა, შემდეგ მოვიდა სხვა ორი კაცი, რომელთაც ასევე გამაუპატიურეს. ძირითადად ერთი და იგივე მამაკაცები იყვნენ, თუმცა, 3-4ჯერ სხვა მამაკაცებიც მოდიოდნენ," - აცხადებს გოგონა.

გამოძიებამ დაადგინა, რომ აბსოლუტურად უმრავლეს შემთხვევაში გოგონებს ანალოგიურად ექცეოდნენ.

დაპატიმრებულია ის ქრისტიანი მღვდელიც, რომელიც ქორწინებების რიტუალებს ატარებდა პაკისტანში.

"ევრონიუსის" ინფორმაციით, პაკისტანის ხელისუფლება ცდილობს ამ ფაქტებს ფართო გახმაურება არ ჰქონდეს, რადგან მათი აზრით, ეს ჩინეთთან სავაჭრო-ეკონომიკურ ურთიერთობაზე უარყოფით გავლენას მმოხდენს.