100-ზე მეტი ადამიანი, რომელთა შორის 26 ბავშვია, გარდაიცვალა რუსებისა და ასადისტების მიერ განხორციელებული საჰაერო დაბომბვების შედეგად უკანასკნელი 10 დღის განმავლობაში ,- ნათქვამია გაეროს ოფიციალურ განცხადებაში.

გაეროში ადამიანის უფლებათა უმაღლესმა კომისარმა, მიშელ ბაჩელეტმა გაეროში წამყვანი სახელმწიფოები დაადანაშაულა ინდიფერენტულობაში სირიაში მიმდინარე ძალადობასთან დაკავშირებით , რომელშიც აქტიურადაა ჩართული რუსეთი.

,,გარდაცვლილთა რაოდენობა ყოველდღიურად იზრდება, საკითხისადმი დაინტერესებას და ძალადობის შეჩერებას კი მსოფლიო ,,კოლექტიური მხრების აჩეჩებით'' პასუხობს, რის შედეგადაც საერთაშორისო რადარებიდან გაქრა იდლიბის პროვინციაში მიმდინარე ძალადობა, გაეროს უშიშროების საბჭოც კი უფუნქციოა არსებულ საკითხთან მიმართებით '' ,- განაცხადა გაეროს ადამიანის უფლებათა დაცვის უმაღლესმა კომისარმა.

იდლიბის პროვინცია წარმოადგენს სირიის ხელისუფლების ოპოზიციის ერთადერთ უკანასკნელ ციხე-სიმაგრეს, რომლის წინააღმდეგ აქტიურად ახორციელებს საჰაერო რეიდებს რუსეთისა და სირიის სამთავრობო ძალების ავიაცია 29 აპრილიდან დღემდე. გაეროს ინფორმაციით, ოპერაციის დაწყებიდან 350 მშვიდობიანი მოქალაქე გარდაიცვალა და ათეულობით ათასი დაშავდა, ხოლო 400 000 კი იძულებით გადაადგილებული პირი გახდა.