"ბიჭის ძმამ თავი მოიკლა, მამამ დარდს ვერ გაუძლო და სიცოცხლე შვილის საფლავზე დაასრულა" - ვინ არის 16 წლის მუშა, რომელიც დღეს მშენებლობაზე გარდაიცვალა

საზოგადოება - 01:55, 17 Jul, 2019

44412

თბილისში, დოლაბაურის ქუჩაზე, მშენებლობაზე დაღუპული მუშა, 16 წლის გიორგი ბეშკენაძეა. არასრულწლოვანი დედასთან ერთად, ლაგოდეხის მუნიციპალიტეტის სოფელ გვიმრიანიდანაა, რომელიც სოფელ აფენის თემში შედის. აფენში

არსებული ინფორმაციით, ბეშკენაძეები ხელმოკლედ ცხოვრობდნენ.

ლაგოდეხის მუნიციპალიტეტის მერის წარმომადგენლის, გია გაფრინდაშვილის ინფორმაციით, რამდენიმე წლის წინ, ბეშკენაძეებს თავს ტრაგედია დაატყდა. გაურკვეველი მიზეზით თავი მოიკლა გარდაცვლილის უფროსმა ძმამ. ოჯახის მამა შვილზე დარდს ვერ გაუმკლავდა და შვილის საფლავზე სიცოცხლე თვითმკვლელობით დაასრულა.

გიორგი ბეშკენაძე მშობლიურ სოფელში ჯერ არ ჩაუსვენებიათ.

შეგახსენებთ, დღეს თბილისში, დოლაბაურის ქუჩაზე, მშენებარე კორპუსიდან მუშა გადმოვარდა და ადგილზე გარდაიცვალა.

მოზარდმა ობიქტზე მუშაობა რამდენიმე დღის წინ დაიწყო. ის ლიფტის შახტში ჩავარდა და ადგილზე გარდაიცვალა. ცხედარი პროზექტურაში გადაასვენეს.

მომხდარზე ჯანდაცვის სამინისტროში განმარტება გაკეთდა, სადაც დაადასტურეს, რომ სამშენებლო ობიექტზე დარღვევები იყო.

უწყების წარმომადგენლების თქმით, უსაფრთხოების არც ერთი ნორმა არ იყო დაცული, რომლების გათვალისწინებაც სავალდებულო იყო. ამ დროისთვის ობიექტზე სამუშაო პროცესი შეჩერებულია.

შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 240-ე მუხლის მე-2 ნაწილით დაიწყო, რაც სამთო სამშენებლო ან სხვა სამუშაოების წარმოებისას უსაფრთხოების ნორმების წესის დარღვევას გულისხმობს, რამაც ადამიანის სიცოცხლის მოსპობა გამოიწვია.