სტიქია მარნეულში - სოფელ ქირაჩმუღლოში მარნეულის მერი მეორედ ჩავიდა, თუმცა დამატებითი ძალების მობილიზება ამ დრომდე არ ხდება

საზოგადოება - 15:50, 14 Jul, 2019

1139

სტიქია მარნეულში - ძლიერმა წვიმამ სოფელ ქირაჩმუღლოში პრობლემები შექმნა. მარნეულის მერი სტიქიის ზონაში უკვე მეორედ ჩავიდა, თუმცა სტიქიის შედეგებს დილიდან მოსახლეობა დამუკიდებლად უმკლავდებოდა.

სოფელში მხოლოდ ერთი ტრაქტორი მუშაობს, რომელიც არხს ასუფთავებს. მოსახლეობა კი ითხოვს შლამითა და წყლით სავსე სახლებისა და ეზოების გასუფთავებაში დახმარებას.

„ამხელა სოფელში მარტო ერთი ტრაქტორი მუშაობს და ეს რას დაგვეხმარება. ისიც მშრალ არხს ასუფთავებს. ჩვენ სახლების და ეზოების გასუფთავებას ვითხოვთ. არავინ არ ჩანს. წელს ძლიერი სტიქია იყო, წინა წლებისგან განსხვავებით,“-განაცხადა ერთ-ერთმა ადგილობრივმა ტელბარ მუსტაფაევამ.

სოფელში ამბობენ, რომ ისინი დახმარებას დილიდან ითხოვდნენ, თუმცა ხელისუფლების წარმომადგენლები ადგილზე დაგვიანებით ჩავიდნენ.

ძლიერმა წვიმამ დააზიანა ნაკვეთები, ღობეები, შიდა გზები, დატბორა საცხოვრებელი სახლების პირველი სართულები. ერთ-ერთი ადგილობრივი მოსახლის ეზოში ბეტონის ღობე ჩამოიშალა.

„კიდევ კარგი ეზოში ბავშვები არ იყვნენ. გუშინ ორ წუთში ეს კედელი მთლიანად ჩამოინგრა. ბეტონის კედელმა მოვარდნილი წყლის შეკავება ვერ შეძლო და ჩამოინგრა,“-განაცხადა ერთ-ერთმა ადგილობრივმა მცხოვრებმა სევილ ჯაფაროვამ.

გარდა ამისა, გარკვეული პერიოდით გადაკეტილი იყო ცენტრალური მაგისტრალიც.

ადგილობრივები ამბობენ, რომ მათ სოფელში მოუწესრიგებელია სანიაღვრე არხები, რის გამოც ყოველი ძლიერი წვიმის დროს, მსგავსი პრობლემები ექმნებათ.

მარნეულის მერი აცხადებს, რომ მიუხედავად იმისა, რომ სახლებში წყალი შევარდა, მოსახლეობას ევაკუაცია არ გახდა საჭირო.

„ზარალის შეფასების კომისია შექმნილია. ჩვენ დავიწყეთ ზარალის შეფასება, სადღაც 4-5- სოფელშ მოვიდა სტიქია. სხვა სოფლებში, მაგალითად წითელი სოფელი, იქ განადგურებულია სახურავები სადაც ჩვენ პირველ დახმარებად დავარიგეთ სპეციალური ტენტები იქ მუშაობენ ჯგუფები. ჩვენ სახურავებზეც დავეხმარებით მოსახლეობას,“-განაცხადა მარნეულის მერმა.