"თქვენ მე იდიოტად მთვლით?" - ზელენსკიმ უკრაინის საგადასახადო სამსახურის უფროსს თანამდებობიდან წასვლა მოსთხოვა

მსოფლიო - 15:46, 13 Jul, 2019

7786

პრეზიდენტმა ვოლოდიმირ ზელენსკიმ თათბირზე უკრაინის საგადასახადო სამსახურის უფროსს ალექსანდრ ვლასოვს თანამდებობიდან წასვლა მოსთხოვა. მისი განცხადებით, ვლასოვი მოვალეობას ვერ ასრულებს, რადგან მის მიერ Facebook-ზე გამოქვეყნებული ინფორმაცია ვოლინის, კარპატისპირეთის, ლვოვისა ფა ჩერნოვიცკის საბაჟო სამსახურების ხელმძღვანელების გთავისუფლების შესახებ სიმართლეს არ შეესაბამება.

ამ თანამდებობის პირთა გათავისუფლება ზელენსკიმ რამდენიმე დღის წინ მოითხოვა, თუმცა, როგორც გაირკვა, თანამდებობიდან გათავისუფლების ნაცვლად, ვლასოვმა ისინი შვებულებაში გაუშვა.

ვლასოვმა პრეზიდენტს უპასუხა, რომ მან ისინი უბრალოდ თანამდებობას ჩამოაცილა, რაზეც ზელენსკი გაბრაზდა და მას პირადად მოსთხოვა განცხადების დაწერა.

"თქვენ მე იდიოტად მთვლით? ჩვენ ყველას გვთვლით იდიოტებად? მინდა პირადად დაწეროთ განცხადება თანამდებობიდან წასვლის შესახებ. შვებულებაში კი არ წახვიდეთ, არამედ რეალურად გააკეთოთ ეს, თუ თქვენ ვერ ახერხებთ ადამიანებთან გამკლავებას, რომლებიც თქვენს ვერტიკალს ექვემდებარებიან. მითხარით ზუსტი დრო, როდის დაწერთ, რომ ეს Facebook-იდან კი არ გავიგო, არამედ რეალური ოფიციალური დოკუმენტებიდან," - განაცხადა ზელენსკიმ.

პრეზიდენტის პასუხად, ვლასოვმა განაცხადა, რომ დღესვე შეიტანს განცხადებას მტავრობის კანცელარიაში.