"კალაძეს აქვს უფლება გახარიასთან მივიდეს და უთხრას, რომ ყველგან მხვდება უკვე ეს ხალხი, შევწუხდი მეც..." - ანტისაოკუპაციო აქციის მონაწილეებმა დედაქალაქის მერს პირადად შეახსენეს, რომ გიორგი გახარია უნდა გადადგეს

საზოგადოება - 15:21, 13 Jul, 2019

1571

ანტისაოკუპაციო აქციის მონაწილეებმა დედაქალაქის მერს პირადად შეახსენეს, რომ გიორგი გახარია უნდა გადადგეს. მოძრაობა "სირცხვილიას" წერვრები მრგვალ ბაღში იმ დროს მივიდნენ, როცა კალაძე სარეაბილიტაციო სამუშაოების დასათვალიერებლად მივიდა.

ახალგაზრდები "ოცნების" ერთ-ერთი ლიდერისგან განმარტებებს 20 ივნისის ღამის შესახებ ითხოვდნენ.
"აქვე კაფეში ვიყავით, გავიგეთ რომ მრგვალ ბაღში ქალაქის მერი აპირებდა მოსვლას. ქალაქის მერი ასევე არის „ქართული ოცნების“ ერთ-ერთი მენეჯერული რგოლის წარმომადგენელი, რომელსაც აქვს უფლება, სიტყვა ჩააგდოს და გახარიასთან მივიდეს და უთხრას, რომ ყველგან მხვდება უკვე ეს ხალხი, შევწუხდი მეც და ვაწუხებთ ასე, რომ მოვიდეთ და ვაჩვენოთ, რომ მაკომ დაკარგა თვალი და კიდევ რამდენიმე ადამიანი დაშავდა და გახარია უნდა გადადგეს,“ - განაცხადა აქციის ერთ-ერთმა მონაწილემ.

კახა კალაძეს აქციის მონაწილეების მოთხოვნებზე და შეკითხვებზე პასუხი არ გაუცია.

მომიტინგეები აცხადებდნენ, რომ გავრილოვის ღამის ავტორს მინისტრის სავარძელში ყოფნის უფლება აღარ აქვს.

„როგორც ხელისუფლებას აქვს მიმდინარე მოვლენებზე პასუხისმგებლობა და უფრო მეტი პასუხისმგებლობა, რა თქმა უნდა, აქვს ხელისუფლებას, ასევე, ოპოზიციას აქვს პასუხისმგებლობა. ყველას აქვს უფლება, გამოხატოს თავიანთი პროტესტი, თავიანთი შეხედულებები, ვერავინ ვერ გაბედავს, რომ კონსტიტუციური კანონის ფარგლებში ხელი შეუშალოს ვინმეს,“ - განაცხადა კალაძემ.