რუსეთის დაბრუნება - უკრაინა პროტესტის ნიშნად ევროსაბჭოს საპარლამენტო ასამბლეას ტოვებს

მსოფლიო - 16:52, 25 Jun, 2019

1326

ევროსაბჭოს საპარლამენტო ასამბლეის წევრი უკრაინის დელეგაცია უმაღლეს რადას მიმართავს, რათა სასწრაფოდ განიხილონ უკრაინის მიერ ევროსაბჭოს საპარლამენტო ასამბლეის დატოვების საკითხი. ამის შესახებ ინფორმაცია ევროსაბჭოს საპარლამენტო ასამბლეაში უკრაინის დელეგაციის წევრმა ლეონიდ იემეცმა ფეისბუკზე გაავრცელა.

შეგახსენებთ, ევროსაბჭოს საპარლამენტო ასამბლეამ (PACE) მიიღო რეზოლუცია, რომელიც რუსეთს ასამბლეაში დაბრუნების საშუალებას აძლევს. ასამბლეის სხდომაზე მიღებულ რეზოლუციას PACE-ს რეგლამენტში ცვლილებები შეაქვს, რომელიც კრძალავს ევროსაბჭოს დელეგაციებისთვის ხმის და ასამბლეაში გამოსვლის უფლების ჩამორთმევას. საქართველოსა და უკრაინის დელეგაციებმა სრული შემადგენლობით ამ რეზოლუციის წინააღმდეგ მისცეს ხმა.

დოკუმენტის წინააღმდეგ ასევე ხმა მისცეს პოლონეთის, ლიეტუვის, ლატვიის, დიდი ბრიტანეთის, ესტონეთისა და შვედეთის დელეგაციების წევრთა უმრავლესობამ.

რეზოლუციას სრული შემადგენლობით მხარი დაუჭირეს საფრანგეთისა და იტალიის დელეგაციებმა, ასევე ავსტრიის, აზერბაიჯანის, კვიპროსის, ესპანეთის, ისლანდიის, ირლანდიის, ნორვეგიის, პორტუგალიის, სერბეთის, სან მარინოსა და თურქეთის მთელმა დელეგაციებმა.

საბოლოო ჯამში, სულ რეზოლუციას ასამბლეის 118-მა წევრმა მისცა ხმა, წინააღმდეგი 62 დელეგატი იყო, 10-მა კი თავი შეიკავა.