ყირგიზეთში, მოსახლეობა (დაახლოებით 5,5 მილიონი ადამიანი) თითქმის 41 მილიონ დოლარს ყოველწლიურად ხარჯავს სხვადასხვა სადღესასწაულო თუ სამგლოვიარო ღონისძიებაზე. ხელისუფლების წარმომადგენლებმა მოსახლეობის ხარჯის კანონმდებლობით შეზღუდვის წინადადება წამოაყენეს.

ბავშვის დაბადება, ქორწილი, იუბილე თუ დაკრძალვა, ყირგიზელებისთვის დიდ სუფრასთანაა დაკავშირებული. ხუთასზე მეტი სტუმრი ლხინის გამმართველის  შეძლებულობაზე და სტატუსზე მეტყველებს. თუ ქორწილია, ხუთ ლიმუზინზე ნაკლები არ უნდა იყოს. თუ იუბილეა, უნდა მოეწყოს რომელიმე ვარსკვლავის კონცერტი. დაკრძალვა - ცალკე თემაა. ასეთ შემთხვევაში, ტრადიციულად, ჭირისუფალი კლავს ცხენს, შესაძლოა -  რამდენიმეს, და ხორცს ურიგებენ სტუმრებს.ასეთია ჩვეულება. ცხენის საშუალო ფასი ორი ათასი დოლარია, ასეთი ხარჯის გაწევის ძალა ყველას არ შესწევს. იძულებული ხდებიან აიღონ კრედიტი.

ყირგიზეთის ხელისუფლება არაერთხელ ეცადა მოქალაქეთა ხარჯების შემცირებას. წინა მინისტრთა კაბინეტი მასიური მხიარულების აკრძალვას, ტაჯიკეთის მაგალითზე ცდილობდა, მაგრამ ამ იდეას მაშინ პარლამენტის უმრავლესობამ მხარი არ დაუჭირა.

ახლა, ხელისუფალნი ირწმუნებიან, რომ ქვეყანაში, სადაც მოსახლეობის ნახევარი სიღარიბის ზღვარს ქვემოთაა, ასეთი მდიდრული მხიარულება ფუფუნების საგანია. ინოვაციის მოწინააღმდეგენი აცხადებენ, რომ ასეთი ზომები შედეგს ვერ გამოიღებენ, რადგან ღონისძიების შემცირების მაგივრად, ყველა ეცდება მაკონტროლებელ ორგანოებთან მოლაპარაკებას.