სტამბოლი ოპოზიციის ხელშია - ექრემ იმამოღლუმ განმეორებით არჩევნებში კიდევ უფრო დამაჯერებელი გამარჯვება მოიპოვა

მსოფლიო - 11:40, 24 Jun, 2019

1977

თურქეთში, ოპოზიციური სახალხო რესპუბლიკური პარტიის კანდიდატმა 49 წლის ექრემ იმამოღლუმ სტამბოლის მერის განმეორებით არჩევნებშიც გაიმარჯვა, ხმების 100 %-ის დათვლის შედეგად მიღებული მონაცემებით თურქეთის ეკონომიკურ, კულტურულ და ისტორიულ ცენტრში ამომრჩეველთა ხმების 54.21% იმამოღლუმ, 44.99% კი მმართველი პარტიის კანდიდატმა ბინალი ილდირიმმა მიიღო. 31 მარტს ჩატარებული არჩევნების შედეგების გაუქმების შემდეგ, როდესაც იმამოღლუმ 48.79% მოაგროვა, ილდირიმმა კი 48.51%, ოპოზიციის წარმომადგენელმა განაცხადა, რომ ის უფრო დამაჯერებლად მოიგებდა და ეს პირობა შეასრულა ახლა კანდიდატებს შორის 10%-იანი სხვაობაა. "ყველაფერი ძალიან კარგად იქნება" - ეს ლოზუნგი ქონდა არჩეული იმამოღლუს არჩევნებზე.

ილდირიმმა დამარცხება უკვა აღიარა და მოწინააღმდეგეს მიულოცა.

„მე ვულოცავ ჩემს კონკურენტს და წარმატებას ვუსურვებ. ამ არჩევნებმა კიდე ერთხელ აჩვენა, რომ ჩვენ ქვეყანაში უპირობო დემოკრატიაა. ვისურვებდი, რომ იმამოღლუმ მთელი თავისი ძალისხმევა ჩადოს ქალაქისა და მისი მაცხოვრებლების მსახურებაში.“- განაცხადა ილდირიმმა.

თავად იმამოღლუმ თავის წარმატებას მთელი ქალაქის გამარჯვება უწოდა და განაცხადა, რომ მზადაა ითანამშრომლოს თურქეთის პრეზიდენტ რეჯეპ ტაიპ ერდოღანთან.

„სტამბოლის გადაუდებელი პრობლემების გადაჭრისთვის აუცილებელია ადგილობრივი ადმინისტრაციისა და ცენტრის კოორდინაცია. მე მზად ვარ ვიმუშაო, არანაირი პოლიტიკა არ აღემატება მოსახლეობის საჭიროებებს, ისეთი როგორიცაა სიმშვიდე, ჯანდაცვა, მუშაობის შესაძლებლობა“- განაცხადა იმამოღლუმ.

პოლიტიკური თვალსაზრისით სტამბოლის მერის პოსტი ეს მომავალი პოლიტიკური კარიერისთვის დიდი დასაწყისია. სწორედ სტამბოლის მერი იყო მოქმედი პრეზიდენტი ერდოღანი 1994-1998 წლებში და სწორედ მისი სიტყვებია,რომ „ვინც მართავს სტამბოლს, მართავს თურქეთს“. სწორედ ამიტომ სტამბოლის მერის არჩევნებს საერთაშორისო ექსპერტები ერთგვარად ერდოღანის მმართველობასთან დაკავშირებით ჩატარებულ რეფერენდუმად მიიჩნევდნენ.