ახალი დეტალები ვაზიანის სამხედრო ბაზაზე კაპრალის დაღუპვის შესახებ - სამხედრო მოსამსახურის ცხედარს ექსპერტიზა რუსთავში, ექსპერტიზის ბიუროში ჩუტარდა და ცოტა ხანში ხაშურში გადაასვენებენ.

როგორც სამხედრო პოლიციაში ამბობენ, მას შემდეგ, რაც კაპრალი შეუძლოდ გახდა, პირველადი სამედიცინო დახმარება ადგილზევე აღმოუჩინეს, შემდეგ სასწრაფო დახმარებით ლაზარეთში გადაიყვანეს და ასევე, სასწრაფო სამედიცინო ბრიგადაც გამოძახეს, თუმცა მისი გარდაცვალება დაფიქსირდა. ირაკლი ბაზერაშვილის თქმით, გარდაცვალების მიზეზის დასადგენად სასამართლო სამედიცინო ექსპერტიზა უკვე ჩატარდა, რომლის შედეგი საზოგადოებას ეცნობება.

„პირნათლად ასრულებდა თავის ვალდებულებას. ჯარშიც კარგი სახელი ჰქონდა, სოფელშიც და მეგობრებში. არაფერი პრობლემა არ ჰქონია,“ - აცხადებს გარდაცვლილის მამა, დიმიტრი ხარაზიშვილი.

როგორც გარდაცვლილის ახლობლები ამბობენ, ჯარისკაცი ავღანეთშიც იმყოფებოდა, რის შემდეგაც ვაზიანის სამხედრო ბაზაზე იყო, სადაც გეგმიურ სწავლებას გადიოდა.

„არაფერი პრობლემა არ ჰქონია. ავღანეთში მოიხადა, ტყვიაც მოხვდა, დაიჭრა, მაგრამ იქ არ მომკვდარა და აქ რა პრობლემა უნდა ჰქონოდა,“ - აცხადებენ გარდაცვლილის ახლობლები.

გარდაცვლილის ნათესავები და მეზობლები ჯარისკაცზე რაიმე სახის ზეწოლას და ან ფიზიკურ ძალადობას გამორიცხავენ.

„ან ტრომბია ან გული, თავად ისე ჯანმრთელი ბავშვი იყო. გადაბრუნებული იყო და ხროტინებდაო. რომ გადმოვაბრუნეთო, პულსიც აღარ ესინჯებოდაო. ძალადობა, დაშინება ან ცემა - ასეთი რამ არა,“ - განაცხადა გარდაცვლილის ახლობელმა.