ხარაგაულის რაიონის სოფელ ძირულაში, 50-მდე მუშა შრომის პირობების გაუმჯობესების მოთხოვნით გაიფიცა - ინფორმაციას ამის შესახებ, რკინიგზელთა ახალი პროფკავშირი ავრცელებს.

მათივე ცნობით, შპს ,,ჩინეთის გზებისა და ხიდების კორპორაციის საქართველოს ფილიალმა“ დასაქმებულებს არასრული სახელფასო ანაზღაურება გადაუხადა, რაც მუშებში უკმაყოფილების მთავარი მიზეზი გახდა.

ადგილობრივი დასაქმებულების ცნობით, ისინი მეორე დღეა სრული მაშტაბით არიან გაფიცულები, ითხოვენ შრომის უსაფრთხოებისა და შრომითი პირობების გაუმჯობესებას, ინდივიდუალური შრომითი ხელშეკრულების მოწესრიგებას და სახელფასო დავალიანების დაუყოვნებლივ დაფარვას.

მათივე თქმით, ამ დრომდე კომპანია მოლაპარაკებების წარმოებაზე უარს აცხადებს.

დასაქმებულებმა დახმარებისთვის უკვე მიმართეს რკინიგზელთა ახალ პროფესიულ კავშირს.

პროფკავშირი, თავის მხრივ მოუწოდებს ,,საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო“-ს, სამუშაო პირობებისა და შრომის უსაფრთხოების მონიტორინგის მიზნით, ადგილზე გაგზავნოს შრომის ინსპექციის წარმომადგენლები და მედიაციის მექანიზმის გამოყენებით, უზრუნველყოს კოლექტიურ შრომით დავაზე, მხარეებს შორის მოლაპარაკებების გამართვის პროცესის დაწყება.

რკინიგზელთა ახალი პროფკავშირის წარმომადგენლები სოფელ ძირულაში ხვალ დილიდან ჩავლენ, მუშებს სოლიდარობას გამოუცხადებენ და შესაბამის კონსულტაციებს გაუწევენ.