გორის სამხედრო ჰოსპიტალში 31 წლის მამაკაცი გარდაიცვალა. “ნიუპოსტის” კორეპონდენტის ცნობით, ლევან ჯიოშვილი ჰოსპიტალში ორი დღის წინ მივიდა. ჯიოშვილების ახლობელის, გიორგი ბერიანიძის თქმით, ოჯახს აცნობეს, რომ მამაკაცს ფილტვების ანთება ჰქონდა, რის გამოც მოხდა მისი სტაციონარში განთავსება. მდგომარეობა გართულდა და გუშინ საღამოს გარდაიცვალა.

"ლევანი ჰოსპიტალში საკუთარი ფეხით მივიდა მხარი სტკიოდა, ექიმებმა კი დააწვინეს. ამ დრომდე არ ვიცით მისი გარდაცვალების მიზეზი არაფერს გვეუბნებიან" - განაცხადა გარდაცვლილის ახლობელი გიორგი ბერიანიძე.

ჰოსპიტლის ექიმის განმარტებით, მკურნალ ექიმთან შეთანხმების თანახმად, პაციენტი დილით შემდგომი კვლევებისთვის თბილისში ფილტვის დაავადებათა ეროვნულ ცენტრში უნდა გადაეყვანათ. “31 წლის მამაკაცი თვითდინებით შემოვიდა 2 ივნისს. წინასწარ ჩაუტარდა კვლევა და დაუდგინდა მწვავე პნევმონია. კერძოდ, მარჯვენა ფილტვის ზედა ნაწილის ტუბერკულომა. ამ კვლევის საფუძველზე თერაპიულ განყოფილებაშის ინტენსიურ ბლოკში მოთავსდა. მიმდინარე მკურნალობის ფონზე მდგომარეობა იყო სტაბილური. დღეს პაციენტმა ინტენსიური ბლოკის პალატაში გონი უეცრად დაკარგა. მაშინვე ბრიგადა გამოვიძახეთ. პროტოკოლით გათვალისწინებული რეანიმაციული ღონისძიებები აღმოჩნდა უშედეგო. 17.30 წუთზე დაფიქსირდა უეცარი სიკვდილი." - ამბობს ინფექციური განყოფილების წარმომადგენელი ნელი ჯავახიშვილმა.

31 წლის მამაკაცს სამხარაულის ექსპერტიზის ბიუროს გორის განყოფილებაში ექსპერტიზა გვიან ეამით ჩაუტარდა, რის შემდეგაც გახდება ცნობილი, რა გახდა ახალგაზრდა მამაკაცის გარდაცვალების მიზეზი.

შსს-ს ცნობით, გამოძიება სისხლის სამართლის კოდექსის 116-ე მუხლით დაიწყო, რაც სიცოცხლის გაუფრთხილებლობით მოსპობას გულისხმობს.