ლიბიის შინაგან საქმეთა სამინისტრო მიიჩნევს, რომ ტრიპოლიში რუსეთის საელჩოზე თავდასხმა შესაძლოა დაკავშირებული იყოს, მანამდე მედიაში გავრცელებულ ინფორმაციასთან ლიბიელი ოფიცერის მკვლელობის შესახებ, რომელიც შესაძლოა რუსმა ქალბატონმა ჩაიდინა.

ლიბიური მას-მედია იტყობინებოდა, რომ ტუნისის საზღვრიდან გადმოსულმა, სავარაუდოდ რუსეთის მოქალაქე ქალბატონმა, ტრიპოლის გარეუბანში, საკუთარ სახლში ჩაცხრილა ლიბიელი ოფიცერი, აგრეთვე დაჭრა დედამისიც.

„სავარაუდოდ, ამ თავდასხმით გამოხატეს პროტესტი ლიბიის არმიის საავიაციო მექანიკოსის მკვლელობაზე“, - ამბობს ლიბიის შსს-დან საინფორმაციო სააგენტო LANA-ს წყარო.

მედიის ინფორმაციით, სამართალდამცავმა ორგანოებმა რუსი ქალბატონი უკვე დააკავეს.