ევროპული საქართველოს წევრის, ნინო იმედაშვილის მეუღლეს, ლაშა ბრეგვაძეს, სასტუმრო რედისონში, საცურაო აუზზე, რელიგიური და პოლიტიკური შინაარსის კამათის შემდეგ სამი მამაკაცი თავს დაესხა.

ნინო იმედაშვილი მისი მეუღლის მონაყოლის მიხედვით ამბობს, რომ კამათი პრეზიდენტის წმინდა ნინოს გზაზე წასვლას მოჰყვა. მისივე თქმით, საუბარი ასლან აბაშიძით გაგრძელდა, რაც საბოლოო ჯამში ფიზიკურ დაპისირპირებამდე მივიდა.

"ჩემმა მეუღლემ გამოთქვა კრიტიკული აზრი, რომ რელიგია არ უნდა იყო აფარებული პოლიტიკას. რაზეც აგრესიით უპასუხეს. საუბარი გაგრძელდა, ჩავიდნენ ასლან აბაშიძემდე. ჩემმა მეუღლემ აბაშიძეს შეაგინა, რაზეც მამაკაცები გაღიზიანდნენ. ინციდენტი ადგილზე განიმუხტა. თუმცა, შემდეგ გასახდელში დახვდნენ სამივე. ერთმა მოუქნია დანა, ჩემმა მეუღლემ აიცილა. მეორემ უკნიდან მოუქნია სავარაუდოდ დანა და მოხვდა თავის არეში", - ამბობს ნინო იმედაშვილი ტაბულასთან საუბრისას.

ამ წუთებში ლაშა ბრეგვაძე დაკითხვაზე იმყოფება. ნინო იმედაშვილის ცნობით, დაკითხვაზე იმყოფება სამიდან ორი თავდამსხმელი. მისივე ცნობით, გამოძიება დაიწყო არა ჯგუფური თავდასხმის, არამედ ჯანმრთელობის დაზიანების მუხლით.