შსს-მ ბავშვებს ლისის ტბაზე უმასპინძლა

საზოგადოება - 17:40, 01 Jun, 2019

672

1 ივნისი ბავშვთა დაცვის საერთაშორისო დღეა. ბავშვებს დღეს შინაგან საქმენთა სამინისტრომ, კამპანია ”მეტი სიცოცხლისთვის” ფარგლებში, ლისის ტბაზე უმასპინძლა.

ჩატარდა სხვადასხვა შემეცნებითი და სახალისო აქტივობა.

სამინისტროს ინფორმაციით, ღონისძიების მიზანია საგზაო მოძრაობის უსაფრთხოების საკითხებზე ბავშვების ცნობიერების ამაღლება. შსს-ს ორგანიზებით, ლისის ტბის მიმდებარე ტერიტორიაზე, 11:00 საათიდან დაიწყო გასართობი და შემეცნებითი აქტივობები.

დაწყებითი კლასის მოსწავლეებს, მათ მშობლებს და ყველა დაინტერესებულ ადამიანს შეეძლო ღონისძიებაზე დასწრება. პირველ ივნისს ლისის ტბაზე ასულ მოზარდებს შესაძლებლობა ჰქონდათ, დაეთვალიერებინათ იმიტირებული ქალაქი, სადაც წარმოდგენილი იყო შინაგან საქმეთა სამინისტროს მომსახურების სააგენტოს კონსტრუქციები და გაიცემოდა საბავშვო მართვის მოწმობები.

ასევე, მოზარდები გაეცნენ „112″-ის მობილური აპლიკაციის ინსტალაციას, სადაც ოპერატორებმა მათ აპლიკაციის გამოყენების წესები განუმარტეს. გარდა ამისა, ლისის ტბის მიმდებარედ წარმოდგენილი იყო სამინისტროს სხვა დანაყოფების თემატური სივრცეები: „112″-ის შენობის მაკეტი, დაცვის პოლიციის საბავშვო ინსტალაციები. ექსპერტ-კრიმინალისტებმა კი, ბავშვებს ქიმიური შოუ წარუდგინეს.

საგზაო მოძრაობის წესებთან დაკავშირებით, მოზარდებს შესაძლებლობა ჰქონდათ, მონაწილეობა მიეღოთ სტრატეგიულ თამაშში, რომლის გამარჯვებულებიც სიმბოლური საჩუქრებით დაჯილდოვდნენ. შინაგან საქმეთა სამინისტროს ღონისძიება საბავშვო სტუდიის კონცერტით დასრულდა.