მასობრივი შეიარაღებული თავდასხმა მოხდა აშშ-ში. ვაშინგტონიდან 355 კილომეტრში, ვირჯინია ბიჩის მუნიციპალურ შენობაში უცნობმა პირმა ცეცხლი გახსნა. დაღუპულია 12 ადამიანი, 4 კი დაშავდა.

გამოძიება თავდამსხმელი ვინაობას არ ასახელებს, თუმცა Wall Street Journal-ი ადგილობრივ სამართალდამცავი უწყების წარმომადგენელზე დაყრდნობით იუწყება, რომ ის კომუნალური სამსახურის თანამშრომელი იყო.

თავდამსხმელი პოლიციასთან ორმხრივი სროლის დროს დაიღუპა.

სროლა ატლანტის ოკეანის სანაპირო ქალაქ ვირჯინია ბიჩის მუნიციპალურ შენობაში საღამოს 4 საათზე გაისმა. დაზარალებულთა შორის არის პოლიციის ოფიცერიც, თუმცა, როგორც სამართალდამცველებმა თქვეს, ის ჯავშანჟილეტმა იხსნა.

„მსხვერპლი შენობის სამივე სართულზე აღმოვაჩინეთ. ასევე ერთი ცხედარი შენობის გარეთ, მანქანაში იყო. ჩვენი მიზანია, რაც შეიძლება, სწრაფად მოვახდინოთ შენობაში მყოფი ყველა ადამიანის იდენტიფიცირება, რომ სწორი ინფორმაცია მივაწოდოთ დაღუპულთა ოჯახის წევრებს. რამდენიმე დაშავებული საავადმყოფოშია გადაყვანილი. დადგენილია თავდამსხმელის ვინაობაც. მასსა და სამართალდამცველებს შორის დაპირისპირება და ორმხრივი სროლა საკმაოდ დიდხანს გრძელდებოდა,“ - განაცხადა ვირჯინია ბიჩის პოლიციის უფროსმა, ჯიმ სერვევამ.

„ყველაზე საშინელი დღე ვირჯინია-ბიჩის ისტორიაში. დაშავებულები ჩვენი მეგობრები, ჩვენი მეზობლები და კოლეგები არიან“ - განაცხადა ქალაქის მერმა ბობი დაიერმა.

მომხდარის შესახებ საქმის კურსში სასწრაფოდ ჩააყენეს შეერთებული შტატების პრეზიდენტი. შტატის სენატორმა თიმ ქეინმა ამ თავდასხმის შემდეგ განცხადება ტვიტერის საშუალებით გააკეთა. მან დაღუპულთა ოჯახებს მიუსამძიმრა და პირობა დადო, რომ გააგრძელებს ზეწოლას კონგრესზე, რათა იარაღით ძალადობა თავიდან აცილებული იყოს.

ვირჯინია-ბიჩი მდებარეობს ატლანტის ოკეანის სანაპიროზე და ის 450 ათასი ადამიანი ცხოვრობს.