ევროპარლამენტის არჩევნები - წინასწარი შედეგებით კვლავ ევროკავშირის მომხრე პარტიები ლიდერობენ

მსოფლიო - 15:46, 27 May, 2019

1246

ევროპარლამენტის არჩევნებში წელს რეკორდული რაოდენობით ამომრჩეველი მონაწილეობდა. ევროკავშირის 28 ქვეყანაში საკუთარი არჩევანი 200 მილიონზე მეტმა ამომრჩეველმა გააკეთა. აქტივობამ 51%-ს მიაღწია.

ამ არჩევნებში წარმატებას უწინასწარმეტყველებდნენ მემარჯვენე-პოპულისტურ პარტიებს, რომლებმაც ბოლო წლებში პოპულარობა ევროკავშირის ბევრ ქვეყანაში მოიპოვეს, ასეთმა პარტიებმა საკმაო წარმატებას მიაღწიეს, თუმცა შედეგების მიხედვით, უმრავლესობას ვერ მოიპოვებენ.

ქვეყნებში, სადაც ასეთი პარტიები ხელისუფლებაში არიან: იტალია, უნგრეთი და პოლონეთი, მემარჯვენე-პოპულისტებმა პირველი ადგილები დაიკავეს.

საფრანგეთში მარინ ლე პენის „ნაციონალურმა კრებამ“ პირველი ადგილი დაიკავა და მისი შედეგი ოდნავ აღემატება პრეზიდენტ ემანუელ მაკრონის პარტიის შედეგს.

საბერძნეთში პირველი ადგილი დაიკავა კონსერვატიულმა პარტიამ „ახალი დემოკრატია“, რამაც სოციალისტი პრემიერი ალექსის ციპრასი იძულებული გახადა ქვეყანაში დაუყოვნებლივ, ვადამდელი საპარლამენტო არჩევნები დაენიშნა.

ბრიტანეთში ევროპარლამენტის არჩევნებში ნაიჯელ ფარაჯის ბრექსიტის პარტია ლიდერობს.

ისეთ ქვეყნებში როგორიცაა ნიდერლანდები და დანია, ევროსკეპტიკოსი პარტიები დამარცხდნენ, ესტონეთში მემარჯვენე პარტიამ CPPE-მ მხოლოდ მეოთხე ადგილი დაიკავა და ვერცერთი მანდატი ვერ მოიპოვა.

ესპანეთში და პორტუგალიაში მმართველმა მემარცხენე-ცენტრისტულმა პარტიებმა გაიმარჯვეს.

ლიბერალურმა პარტიებმა გაიმარჯვეს სლოვაკეთში.

ასევე ბევრ ქვეყანაში წარმატებას მიაღწიეს ეკოლოგიურმა პარტიებმა. გერმანიაში „მწვანეებმა“ წაართვეს ხმები მმართველ ბლოკს- „ქრისტიან-დემოკრატიული კავშირისა“ და „ქრისტიან-სოციალური კავშირის“ ალიანსს და მეორე ადგილზე გავიდნენ.

წინასწარი პროგნოზის მიხედვით, მემარჯვენე-ცენტრისტული ჯგუფი „ევროპის სახალხო პარტია“ ახალ ევროპარლამენტში 178 მანდატს მიიღებს, ხოლო „სოციალ-დემოკრატები“ 152 ადგილს დაიკავებენ. „მწვანეებს“ 67 დეპუტატი ეყოლებათ, ხოლო ლიბერალებისა და დემოკრატების ალიანსს 108.