"გვაფრთხილებდნენ, მაგ კაცის ლექციაზე გოგონები უკან დასხედითო" - სტუდენტი სექსუალურ შევიწროვებაზე ბათუმის უნივერსიტეტში

საზოგადოება - 16:34, 22 May, 2019

1151

პროფესორს, რომელსაც სტუდენტი სავარაუდო სექსუალურ შევიწროებაში ადანაშაულებს, ბათუმის სახელმწიფო უნივერსიტეტმა სტუდენტებთან სააუდიტორიო საქმიანობა დროებით შეუჩერა. ადმინისტრაციაში ამბობენ, რომ განრიდება ლექტორთან შეთანხმებით მოხდა, მანამ ვიდრე ვითარება საბოლოოდ არ გაირკვევა. პარალელურად, საკითხის შესწავლას სასწავლებლის ეთიკური საბჭო გეგმავს. ფაკულტეტის დეკანი ამბობს, რომ საქმისწარმოების დასაწყებად სტუდენტის წერილობით განცხადებას ელოდებიან. ლექტორის შესახებ პრეტენზია სტუდენტმა ორი დღის წინ საჯაროდ გამოთქვა. თქვა, რომ პროფესორის მხრიდან ადგილი ჰქონდა მიმოწერას, სადაც ის ფოტოების გაგზავნას თხოვდა. სტუდენტმა უკვე მიმართა შსს. უწყების ინფორმაციით, საქმე სისხლის სამართლის კოდექსის 150-ე მუხლით აღიძრა, რაც იძულებას გულისხმობს და ისჯება ჯარიმით ან პატიმრობით. სავარაუდო სექსუალური შევიწროების ფაქტზე, სახალხო დამცველმა საქმის შესწავლა, საკუთარი ინიციატივით დაიწყო.

უნივერსიტეტში აცხადებენ, რომ პროფესორი მივლინებით უცხოეთში იმყოფება, მასთან დაკავშირება მედიამ ვერ შეძლო.

სტუდენტები ლექტორის უნივერსიტეტიდან გაშვებას ითხოვენ.

''არ გვსურს ამ ადამიანმა ჩვენთან ლექციები ჩაატაროს, თუ მოვა სემინარებს არ დავესწრებით. არ მოსულა და სავარაუდოდ, მომხდარიდან გამომდინარე არც იქნება. ისედაც გადატვირთული გრაფიკი აქვს და ლექციებზე და სემინარებზე ვერ დადის. ჩვენი აზრით დღეს არ მოვა. კომუნიკაცია რა თქმა უნდა გვქონდა, მეორე დღესვე მთელმა კურსმა გავიგეთ, მივაწვდინეთ ინფორმაცია დეკანს, შესაბამისი ღონისძიებები გაატარა. ესაუბრა რექტორს. გვინდა, არა მარტო ჩვენს კურსს მოშორდეს ასე ვთქვათ, არამედ უნივერსიტეტიდანაც გაუშვან. მიმოწერა, დაახლოებით ალბათ ერთი კვირა გრძელდებოდა. ასე ვთქვათ ინტიმური ფოტოების თხოვნა და ფსიქოლოგიური ზეწოლა იყო. ლექტორის და სტუდენტის ურთიერთობა მოგეხსენებათ როგორია. სტუდენტს ვფიქრობ შეეშინდა იმიტომ, რომ შეიძლება ჩაეტოვებინა. ლექტორის მხრიდან ასეთი მუქარა არ ყოფილა, მაგრამ ალბათ შეეშინდა. კონკრეტულად ჩემთან მიმოწერა არ ქონია, მაგრამ მსმენია სხვა კურსელებისგანაც. ასევე მაღალკურსელებიც გვაფრთხილებდნენ, მაგ ადამიანის ლექციებზე გოგონები უკან დასხედითო," - განაცხადა ერთ-ერთმა სტუდენტმა.