დაპირისპირება 51-ე სკოლაში - დირექტორს და მოსწავლეებს პოლიციაში გვიანობამდე კითხავდნენ

საზოგადოება - 10:11, 21 May, 2019

825

თბილისის 51-ე საჯარო სკოლასთან მოსწავლეებს შორის მომხდარ დაპირისპირებასთან დაკავშირებით, პოლიციის განყოფილებაში სკოლის დირექტორისა და მოსწავლეების გამოკითხვა გვიანობამდე გაგრძელდა.

მოზარდებმა შენობა კომენტარის გარეშე დატოვეს, დირექტორმა კი მედიასთან მცირე განმარტება გააკეთა. მანანა თურქაძე გამორიცხავს, რომ დაპირისპირება დამამთავრებელი კლასის მიერ გადაღებულ ვიდეორგოლს მოყვა.

"არ ვადასტურებ გავრცელებულ ინფორმაციას,"-განაცხადა თურქაძემ.

არსებული ინფორმაციით, 51-ე სკოლის მე-12 კლასელების ბოლო ზარის ვიდეოკლიპი ქუჩური გარჩევის მიზეზი გახდა. სკოლის უკანა ეზოში ახალგაზრდები ერთმანეთს ფიზიკურად გაუსწორდნენ. თვითმხილველები მასობრივ ჩხუბსა და დანებზე ლაპარაკობენ. ჩხუბის მას შემდეგ დაიწყო, რაც სკოლის მოსწავლეების ერთი ჯგუფი მათ თანაკლასელებზე იმის გამო გაბრაზდა, რომ კლიპში ქუჩური მენტალიტეტი გააშარჟეს.

შსს-მ მომხდარ ფაქტზე გამოძიება 126-ე ძალადობის მუხლით დაიწყო. შსს არ ადასტურებს ერთ-ერთი მოსწავლის დაჭრის ფაქტს.

შეგახსენებთ, 2017 წლის 1 დეკემბერს 51-ე სკოლაში მოსწავლეებს შორის მომხდარი დაპირისპირებას ამავე სკოლის 2 მოსწავლე ლევან დადუნაშვილი და დავით სარალიძე ემსხვერპლნენ.