მალხაზ მაჩალიკაშვილი სახელმწიფო უსაფრთხოების სამსახურში დაკითხვაზე დღეს არ მივიდა. მისი განცხადებით, იგი ხვალ აპირებს უწყებაში მისვლას. მას რამდენიმე წუთის წინ სუს–ის წარმომადგენლებმა გადასცეს უწყება, რომლის მიხედვითაც იგი მოწმის სახით არის დაკითხვაზე დაბარებული. შვილმოკლულმა მამამ ოქმი არ ჩაიბარა.

„ამ წელიწადნახევარში პირველი დღიდან სულ ამას ცდილობდნენ გაენადგურებინათ ვახა, გაენადგურებინათ თემირლანის საქმე და იმას ცდილობენ და უნდათ ძალით, ძალიან გულით უნდათ იმათ, რომ იმას, რომ მიაღწიონ მაგრამ ეს არ მოხდება. ამათი ერთადერთი მიზანი არის ის და თუნდაც მე რომ დამიჭირონ მათდა საუბედუროდ ჩემს ზურგს უკან დგას ძალიან ბევრი ხალხი. გუშინ, ევროპაში მთელი ქართველთა დიასპორა, მთელი ჩეჩენ-ინგუშეთთა დიასპორა შეიკრიბა. ეს ამათ არ შერჩებათ. ამათ რაც ახლა გამოაქვეყნეს ეს განცხადება, სუს-მა დაუსვა თავის ისტორიას წერტილი. ამათ შეეძლოთ ერთი სიტყვით ეს 9 თვე, რომ აქ არ გამეტარებინა მე. ერთი სიტყვით, დიახ, ბოდიშით ბატონო ვახა, ჩვენ მოგვივიდა შეცდომა. რატომ არ იძახიან შურისძიების მცდელობას, რატომ არ იძახიან მკვლელობის მცდელობას, იმიტომ რომ შურისძიების მცდელობას რომ იტყვიან ამას ყველა მიხვდება. როდის იძიებს კაცი შურს? როცა არაფერში დამნაშავე არ არის და მოგიკლავენ ვიღაცას. აი ამიტომ არ იძახიან და პირდაპირ იმ კონტექსტში გადაიტანეს ტერაქტის მცდელობა. სირცხვილი ამათ, სირცხვილი ამ უღირსებს,“-განაცხადა მალხაზ მაჩალიკაშვილმა.

ხელისუფლებას მიზანმიმართულ დევნაში ადანაშაულებს თემირლან მაჩალიკაშვილის დედა.

„ამაზე უარესი არ იყო ფოფხაძე? ჩვენ უბრალო ხალხი ვართ, გლეხი ხალხი ვართ, გამწარებულები ვართ, გულნატკენები ვართ მა ხელისუფლებისგან განადგურებულები ვართ. ჩვენს სიცოცხლეს აზრიც არ აქვს დღეს. რა მიზნით განცხადება გააკეთა ფოფხაძემ ან რა ჰქონდა ისეთი ტრაგედია, რომ პარლამენტში შევალ და თავს ტროტილით ავიფეთქებო. რა ბრალდება წაუყენეს და რეაგირება მოახდინეს? ან ტერორისტი უწოდეს? უბრალო რამეზე რომ ჩემს მეუღლეს ტერორისტობასაც აბრალებენ ვერა და ვერ გაძღა ეს ხელისუფლება ჩვენი ტრაგედიით,“-განაცხადა მედიკო მარგოშვილმა.