დავით გარეჯში ახალგაზრდებმა მშვიდობიანი აქცია გამართეს. საქართველოს დროშებით აღჭურვილმა აქციის მონაწილეებმა ცოცხალი ჯაჭვი შეკრეს და ხელისუფლებას მოუწოდეს, რომ სადაო ტერიტორიებთან დაკავშირებული პრობლემა დროზე მოაგვაროს და ჩვენი ქვეყნის კუთვნილი ტერიტორია დაიცვას. აქცია სოფელი უდაბნოდან, საგარეჯოდან და თბილისიდან ჩასულმა ახალგაზრდებმა გამართეს.

არსებობდა ინფორმაცია, რომ დღეს, 5 მაისს აზერბაიჯანელი მესაზღვრეები ბილიკს ისევ ჩაკეტავდნენ და საქართველოს მხრიდან აღარავის გაატარებდნენ. ამის გამო დღეს ასეულობით ადამიანი ჩავიდა დავით გარეჯაში და მშვიდობიანი პროტესტი გამოხატა აქამდე არსებული ან მოსალოდნელი შეზღუდვების წინააღმდეგ.

მათ დავითგარეჯას მონასტრის ტერიტორიაზე საქართველოს ეროვნული დროშები მიიტანეს.

აქციის მონაწილეების განცხადებით ისინი სახელმწიფოსგან კონკრეტულ ნაბიჯებს ელოდებიან.

დავით გარეჯში ვითარება 25 აპრილს მას შემდეგ დაიძაბა, როდესაც აზებაიჯანელმა მესაზღვრეებმა უდაბნოს მონასტერთან მისასვლელი გზა ჩაკეტეს. მოგვიანებით, აღდგომის დღესასწაულთან დაკავშირებით გზა გაიხსნა, თუმცა აზერბაიჯანელები აცხადებდნენ, რომ ეს დროებითი იყო.

_{ფოტო: რუსთავი 2}