ჩეხეთის საკონსტიტუციო სასამართლომ სასტუმროს ნება მისცა არ მიიღოს რუსები, რომლებიც ყირიმის ანექსიას არ დაგმობენ

მსოფლიო - 19:41, 01 May, 2019

1249

ჩეხეთის საკონსტიტუციო სასამართლომ არ მიიჩნია დისკრიმინაციულად ოსტრავში მდებარე სასტუმრო Brioni-ის ადმინისტრაციის გადაწყვეტილება, იმასთან დაკავშირებით, რომ სასტუმროში განთავსებაზე უარი ეთქვათ რუსეთის იმ მოქალაქეებს, რომლებიც წერილობითი ფორმით არ დაგმობენ რუსეთის მიერ ყირიმის ანექსიას.

2014 წლის აპრილში სასტუმრო Brioni Boutique Hotel-ში გამოაკრეს განცხადება , რომელშიც ნათქვამი იყო, რომ რუსებს არ შეეძლოთ ამ სასტუმროში გაჩერება, თუ ისინი შესაბამის განცხცადებას არ მოაწერდნენ ხელს. ამის შემდეგ სავაჭრო ინსპექციამ სასტუმრო 50 ათასი კრონით დააჯარიმა მომხმარებ ლის დისკრიმინაციის გამო. სასტუმრომ ამის გამო სასამართლოში იჩივლა, საქალაქო და უზენაესმა სასამართლოებმა სასტუმროს სარჩელი არ დააკმაყოფილეს, თუმცა საკონსტიტუციო სასამართლომ შეცვალა უზენაესი სასამართლოს გადაწყვეტილება და განაცხადა, რომ მომხმარებლები წინასწარ იყვნენ გაფრთხილებულები მომსახურეობის პირობებზე და შეეძლოთ სხვა სასტუმროს არჩევა,

საკონსტიტუციო სასამართლოს შეფასებით სასტუმროს ადმინისტრაციას სურდა თავისი პოზიციის გამოხატვა, რათა „ნაწილობრივ მაინც მოეხდინა გავლენა მათზე, ვინც რუსეთის პოლიტიკურ ცხოვრებაში მონაწილეობს.“ სასამართლომ ასევე დაადგინა, რომ სასტუმროს მოქმედება „შეესაბამებოდა ჩეხეთის როგორც საგარეო პოლიტიკას, ასევე საერთაშორისო ორგანიზაციების პოლიტიკასაც.“

უზენაესმა სასამართლომ თავის გადაწყვეტილებაში იაროსლაბ ჰაშეკის რომანიდან „ყოჩაღი ჯარისკაცი შვეიკი და მისი თავგადასავალი“ მოახდინა ციტირება, სადაც სამიკიტნოს პატრონი პალივცი ამბობს „სტუმარი სტუმარია, თურქიც კი.“. ამის საპასუხოდ საკონსტიტუციო სასამართლომ კარელ ჩაპეკის პიესა „თეთრი ჭირი“ გამოიყენა სადაც ექიმი გალენი უარს ამბობს თავისი წამალი, ისეთ ადამიანებს მისცეს, რომლენსაც ომის შეჩერება შეეძლოთ, მაგრამ ეს არ გააკეთეს.