მაჩალიკაშვილი ხელისუფლების მხრიდან მის წინააღმდეგ მოწყობილ პროვოკაციაზე საუბრობს: უნდათ, უბრალოდ, რაღაცის რაღაცასთან დაკავშირებით გამანადგურონ ხალხის თვალში

საზოგადოება - 18:39, 30 Apr, 2019

937

პანკისის ხეობაში მომკლული ბიჭის, თემირლან მაჩალიკაშვილის მამა, მალხაზ მაჩალიკაშვილი ხელისუფლების მხრიდან მის წინააღმდეგ მოწყობილ კიდევ ერთ პროვოკაციაზე საუბრობს.

მაჩალიკაშვილის თქმით, მას თავის მეგობრის ნომრით დაუკავშირდნენ და გარკვეული ნივთების გადაცემა სთხოვეს. მაცალიკაშვილი შეხვედრაზე ვერ წავიდა, მის მეგობარს კი დაურეკა და ბოდიში მოუხადა. ამის შემდგომ გაირკვა, რომ მაჩალიკაშვილს, თავისი მეგობრის, პაატა აბჟანდაძის ნომრით, დაუდგენელი პირები დაუკავშირდნენ.„ბოლო ზარი იყო ამერიკიდან, ვითომ პაატა აბჟანდაძის სახელით დარეკილი მესენჯერში და იქ იყო ლაპარაკი ამ თემაზე, მოვლენ ადამიანები გადმოგცემენ რაღაცასო. ის რაღაც რა იყო, მე აზრზე არ ვარ. ნივთი გამოგზავნილია თუ არა, მაგაზეც ვერაფერს გეტყვით იმიტომ, რომ ჩემთან არაფერი მოუტანიათ, მე არაფერი არ ამიღია. სიმართლე გითხრათ, მაინტერესებს იმიტომ, რომ ეს პროვოკაციები და ეს შემოთავაზებები, სადმე შეხვედრები, რაღაცას გადმოგცემდით, რაღაცას გავაკეთებდით, უკვე ერთი წელია, მე ამას ვისმენ და თავს ვარიდებ. პირდაპირ შემიძლია, ვთქვა, რომ ეს არის უსაფრთხოების სამსახურის საქმე, მათი არაადამიანური ქცევები, მათი ნაძირლობა, მათი უღირსობა. ჩემი დაკავება არ უნდათ, არც მომკლავენ, არც დამაკავებენ - ამას რა მოჰყვება, ამათ კარგად იციან. ამათ უნდათ, უბრალოდ, რაღაცის რაღაცასთან დაკავშირებით გამანადგურონ ხალხის თვალში,“ - განაცხადა მალხაზ მაჩალიკაშვილმა.