"სამართალდამცავები გამომწვევად იქცეოდნენ, ბიჭებს ეძახდნენ, თუ მაგარი ბიჭები ხართ, მოდითო"- პანკისის მკვიდრი ხეობაში მომხდარ მოვლენებზე

საზოგადოება - 23:07, 23 Apr, 2019

864

პანკისის მკვიდრმა, ლუიზა მეთოშვილმა ხეობაში მომხდარი მოვლენები გადაცემა „არჩევანში“ შეაფასა და განაცხადა, რომ მომხდარ დაპირისპირებასთან დაკავშირებით პასუხისმგებლობა მოსახლეობასაც ეკისრება და ხელისუფლებასაც.

მისი თქმით, მოსახლეობა ერთი წელი ითხოვდა სპეციალისტების ჩართულობით დისკუსიას, რომ დარწმუნებულიყო ჰესის მშენებლობის უსაფრთხოებაში. თუმცა, ხელისუფლება პანკისში შევიდა სპეცრაზმით.

„ინციდენტი, რომელიც მოხდა აქციის დროს სოფელ ძიბახევში, ჩვენ თვითკრიტიკულები ვართ ამ ნაწილში და მივიჩნევთ, რომ ის პროტესტის ფორმა, რომელიც ჩვენი მხრიდან იყო გამოყენებული, შეიძლებოდა, გაცილებით დემოკრატიული ყოფილიყო, მაგრამ ძალიან მნიშვნელოვანია მთელი ამ პროცესის დაკვირვება და იმაზე მსჯელობა, როგორც ჩვენი მხრიდან, ასე მთავრობის მხრიდან და კომპანიის მხრიდან, რამ მიიყვანა ზოგადად მოსახლეობა, ამ ფორმით გამოეხატა თავიანთი პროტესტი,“ - განაცხადა ლუიზა მუთოშვილმა.

ლუიზა მუთოშვილის თქმით, საჭირო არ იყო სპეცრაზმის გამოყენება. მისი ინფორმაციით, მოსახლეობა მხოლოდ იმას ითხოვდა, რომ ჰესის მშენებელი კომპანიის წარმომადგენლებს გასაუბრებოდა.

მისივე თქმით, ორი დღის წინ სპეცრაზმმა მოახდინა მოსახლეობის პროვოცირება. ლუიზა მუთოშვილის განცხადებით, ხელისუფლებამ ძალიან კარგად იცოდა პანკისელების ხასიათი და იცოდა ისიც, რა ტიპის პროტესტი შეიძლება, ამას მოჰყოლოდა. აქედან გამომდინარე, ლუიზა მუთოშვილი ფიქრობს, რომ ადგილობრივების პროვოცირებით მთავრობამ საზოგადოებას დაანახა, თუ როგორი მოსახლეობა ცხოვრობს პანკისის ხეობაში და ის, რომ მათთან ძალის მიერი მეთოდებით საუბარია აუცილებელია.

"დაგვანახეს ძალა. გამომწვევად იქცეოდნენ. ბიჭებს ეძახდნენ, თუ მაგარი ბიჭები ხართ, მოდითო,“ - განაცხადა ლუიზა მუთოშვილმა.

ლუიზა მუთოშვილი აცხადებს, რომ, თუკი მასობრივი დაკავებები დაიწყება, მაშინ პანკისის ხეობის ყველა მკვიდრი ჩავა თელავში და მოითხოვს, რომ ყველა დააკავონ, რადგან ხეობის დაცვაში ყველა იყო ჩართული.