პორტალმა Sky News-მა გამოაქვეყნა ვიდეო, რომელშიც ასახულია შრი-ლანკას ტერაქტების ერთ-ერთი სავარაუდო შემსრულებელი. ვიდეოში ჩანს როგორ შედის მამაკაცი დიდი ზურგჩანთით ნეგომბოს წმინდა სებასტიანის ეკლესიაში. ამ ეკლესიაში მომხდარი აფეთქება ყველაზე სისხლიანი აღმოჩნდა , დაიღუპა 110 ადამიანი.

შრი-ლანკას ხელისუფლება ქვეყანაში მომხდარ ტერაქტებს ახალ ზელანდიაში კრაისტჩერჩის მეჩეთზე მომხდარ თავდასხმაზე შურისძიებად აფასებს. სადაც ავსტრალიელმა მამაკაცმა მეჩეთზე თავდასხმისას 50 ადამიანი მოკლა.

21 აპრილს კვირას, როდესაც კათოლიკეები აღდგომას ზეიმობდნენ, შრი-ლანკის სასტუმროებსა და კათოლიკურ ეკლესიებში აფეთქებების სერია მოხდა. უკანასკნელი მონაცემებით 321 ადამიანი დაიღუპა. აღნიშნულ თავდასხმებთან დაკავშირებით დაკავებულია 40 ეჭვმიტანილი. ტერაქტების ორგანიზებაში შრი-ლანკას ხელისუფლებამ ისლამური დაჯგუფება „ტაუჰიდ ჯამაათი“ დაადანაშაულა.