8 აფეთქება აღდგომის დღეს - შრი-ლანკაზე დაღუპულთა რიცხვი 290-მდე გაიზარდა

მსოფლიო - 10:43, 22 Apr, 2019

1660

21 აპრილს კვირას, როდესაც კათოლიკეები აღდგომას ზეიმობდნენ, შრი-ლანკის სასტუმროებსა და კათოლიკურ ეკლესიებში აფეთქებების სერია მოხდა. მსხვერპლის რაოდენობა ამ დროისთვის 290-ს აღწევს, დაშავებულია 500-მდე ადამიანი. ვარაუდობენ რომ მსხვერპლის რაოდენობა ისევ გაიზრდება, რადგან დაშავებულთაგან ბევრი ადამიანი მძიმე მდომარეობაშია.

8 აფეთქებიდან პირველი ექვსი აფეთქება თითქმის ერთდროულად მოხდა, კოხჩაიკადეს, ბატიკალოას და ნეგომბოს ეკლესიებში, სააღდგომო მსახურების დროს, ასევე დედაქალაქ კოლომბოს ცენტრში მდებარე სასტუმროებში: „შანგრი ლა“ , „სინამონ გრანდი“ და „კინსგბერგი“. გავრცელდა ცნობა რამდენიმე ათეული დაღუპულის შესახებ.

2 საათის შემდეგ კოლომბოში მეშვიდე აფეთქებაც მოხდა პატარა სასტუმროში, რომელიც ზოოპარკთან ახლოს მდებარეობს. აქ 2 პოლიციელი დაიღუპა.

მერვე აფეთქება დედაქალაქის გარეუბანში, დემატაგოდაში მოხდა, დაიღუპა 3 პოლიციელი.

ადგილობრივი ხელისუფლების განცხადებით, დაღუპულთა შორის 27 უცხოელია, მათ შორის არიან დიდი ბრიტანეთის, აშშ-ის, თურქეთის, პორტუგალიის, ინდოეთის და ნიდერლანდების მოქალაქეები. აფეთქებების შედეგად დაშავებულებს შორის საქართველოს მოქალაქეები არ არიან

თავდასხმაზე პასუხისმგებლობა ჯერჯერობით არცერთ ორგანიზაციას არ აუღია, შრი ლანკის თავდაცვის მინისტრის მტკიცებით, აფეთქების ორგანიზატორები ხელისუფლებისთვის ცნობილია, მისი თქმით აფეთქებების უმრავლესობა თვითმკვლელმა ტერორისტებმა განახორციელეს. აფეთქებასთან კავშირის ბრალდებით დაკავებულია 24 ადამიანი. ეჭვმიტანილების დაკავების ოპერაციისას 3 პოლიციელი დაიღუპა.

მასშტაბურ ტერაქტებს მსოფლიო ლიდერები გამოეხმაურნენ, მათ დაღუპულთა ოჯახებს მიუსამძიმრეს და შრი ლანკას თანადგომა გამოუცხადეს ტერორიზმთან ბრძოლაში.