უამინდობამ თბილისსა და რეგიონებში პრობლემები შექმნა

შემთხვევა - 10:37, 18 Apr, 2019

1113

ძლიერმა ქარმა დედაქალაქში პრობლემები შექმნა, გვიან ღამით მოსკოვის გამზირზე ხე წაიქცა, იქვე მდგომ ავტომობილს დაეცა და დააზიანა, შემთხვევის შედეგად არავინ დაშავებულა. დაზიანდა ელეტროსადენებიც.

ძლიერმა ქარმა ხე მოგლიჯანუცუბიძის ქუჩაზეც, სადაც ასევე დააზიანა საცხოვრებელი კორპუსის ეზოში მდგარი მანქანა.

ძლიერმა ქარმა ავლაბარში, ლომოურის 8 ნომერში მდებარე საცხოვრებელი სახლის ნაწილი ჩამოანგრია. შემთხვევის შედეგად არავინ დაშავებულა. ადგილობრივები ამბობენ, რომ წლებია უკვე სახლი ავარიულ მდგომარეობაშია და უამინდობის შედეგად ის ეტაპობრივად ინგრევა.

უამინდობამ პრობლემები შექმნა რეგიონებშიც, ზვავსაშიშროების რეჟიმია გუდაური კობის მონაკვეთზე,

საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის ინფორმაციით, მცხეთა-სტეფანწმინდა-ლარსის საავტომობილო გზის გუდაური-კობის მონაკვეთის ერთ ნაწილზე კმ93-კმ99 გზის წმენდის სამუშაოები დაწყებულია. ზვავსაშიშროების გამო, წმენდა ჯერ ვერ ხერხდება გზის მეორე ნაწილზე, კმ100-კმ104 მონაკვეთზე.

გზის დარჩენილ მონაკვეთზე გაწმენდითი სამუშაოები ზვავსაშიშროების რეჟიმის მოხსნისთანავე დაიწყება და საავტომობილო მოძრაობა უმოკლეს ვადებში აღდგება.

შეგახსენებთ, რომ გუდაური-კობის მონაკვეთზე საავტომობილო მოძრაობა გუშინ დილას ქარბუქისა და შეზღუდული ხილვადობის გამო აიკრძალა.

სინოპტიკოსების პროგნოზით უამინდობა კიდევ რამდენიმე დღე გაგრძელდება.