3 ადამიანი დაიღუპა და 4 დაშავდა ნეპალში, ქალაქ ლუკლაში მდებარე ტენცინგ-ჰილარის აეროპორტში, რომელიც მსოფლიოში ყველაზე სახიფათო აეროპორტად ითვლება.

მცირე ზომის თვითმფრინავი Let-410, რომელიც კატმანდუში მიფრინავდა, აფრენისას ვერტმფრენს შეეჯახა და ასაფრენი ბილიკიდან გადავიდა.

საფრენი აპარატები კერძო კომაპნიებს ეკუთვნოდა და მათ ტურისტები და ალპინისტები ჰიმალაის რთულად მისაღწევ ადგილებში გადაჰყავდათ. დაიღუპა თვითმფრინავის პილოტი და ვერტმფრენის გვერდით მდგომი ორი პოლიციელი.

ამ მცირე ზომის აეროპორტს "ჰიმალაის კარიბჭეს" ეძახიან, რადგან ის ერთადერთია, რომელიც ევერესტის მიმდებარე ტერიტორიაზე მდებარეობს. აეროპორტი ზღვის დონიდან 2845 მეტრზე მდებარეობს და ყველაზე სახიფათო აეროპორტად ითვლება მოკლე ასაფრენი ზოლისა და მთიანი რელიეფის გამო.

ზოლის სიგრძე სულ 527 მეტრია. მას ერთი მხრიდან უფსკრული ესაზღვრება, მეორეს მხრივ 4000 მეტრიანი მთის მასივი. აეროპორტში დაჯდომის უფლება მხოლოდ უაღესად გამოცდილ მფრინავებს აქვთ. პრობლემას ქმნის ისიც, რომ აეროპორტი განკუთვნილია ასევე ვერტმფრენებისთვისაც, თუმცა ნეპალის ხელისუფლება 2020 წლისთვის მათთვის ცალკე დასაფრენი მოედნის გაკეთებას გეგმავს.