კირილ სერებრენნიკოვი გაუსვლელობის ხელწერილით შინაპატიმრობიდან გაათავისუფლეს

მსოფლიო - 14:24, 08 Apr, 2019

754

მოსკოვის საქალაქო სასამართლომ რეჟისორი კირილ სერებრენნიკოვი შინაპატიმრობიდან გაუსვლელობის ხელწერილის პირობით გაათავისუფლა, ამის შესახებ ინფორმაციას რუსული მედია ავრცელებს. სერებრენნიკობის თქმით, ის უახლოეს მომავალში სამუშაოს დაუბრუნდება.

რუს რეჟისორს, კირილ სერებრენიკოვს მოსკოვის სასამართლომ გაფლანგვის ბრალდებით, აღმკვეთი ღონისძიების სახით შინაპატიმრობა 2017 წლის აგვისტოში მიუსაჯა. გადაწყვეტილებას ბევრი პოლიტიკურად მოტივირებულად და განსხვავებული აზრის ჩახშობად მიიჩნევდა.

სერებრენიკოვი რუსეთის მთავრობას აკრიტიკებდა ყირიმის ამბების გამო. მხარდაჭერას უცხადებს რუსულ ლგბტ თემს. სერებრენიკოვის შემოქმედება და მისი მოქალაქეობრივი პოზიცია მიუღებელია, როგორც კრემლისთვის ასევე განსაკუთრებულად აშფოთებს რუსული ეკლესიასაც. რეჟისორის ერთ-ერთი ბოლო ნამუშევარი, რომელიც რუდოლფ ნურიევის ცხოვრებას და მოღვაწეობას ასახავდა, ცენზურამ დაბლოკა. ერთ-ერთი ვერსიით, სერებრენიკოვს თვით ვლადიმირ პუტინის სულიერი მოძღვარი დაუპირისპირდა.

ოფიციალურად სერებრენიკოვს სპექტაკლის დადგმისთვის გამოყოფილი თანხის გაფლანგვა - მითვისება ედება ბრალად. სერებრენიკოვი ბრალს არ აღიარებს.

სერებრენიკოვს მხარდაჭერას უცხადებდნენ მსოფლიო ვარსკვლავები და მის გათავისუფლებას ითხოვდნენ.

2018 წელს მისი ფილმი „ზაფხული“ კანის კინოფესტივალის საკონკურსო პროგრამაში იყო ჩართული, თუმცა კირილ სერებრენნიკოვი შინაპატიმრობის გამო ფესტივალს ვერ დაესწრო.