აქცია თბილისში - შრომითი უფლებებისა და უსაფრთხოების დაცვის მოთხოვნით მიმდინარე მსვლელობის მონაწილეებმა მთავრობის ადმინისტრაციიდან ჭავჭავაძის გამზირზე გადაინაცვლეს.

აქციის მონაწილეები იმ ადგილას მივიდნენ, სადაც გუშინ სამშენებლო სამუშაოებისას მიწის ჩამოშლის შედეგად ორი ადამიანი დაიღუპა.

აქციის მონაწილეების თქმით, აქცია ჭავჭავაძის გამზირზე გაგრძელდება მანამ, სანამ მთავრობის წარმომადგენლები არ მივლენ. მათივე თქმით, სერიოზული პრობლემაა ის, რომ ტრაგედიიდან მეორე დღეს, არც ერთი ოფიციალური განცხადება არ გაკეთებულა.

აქციის გამო ჭავჭავაძის გამზირზე საავტომობილო მოძრაობა შეზღუდულია.

თბილისში, ჭავჭავაძის გამზირზე მიმდინარე მშენებლობაზე გუშინ მიწა ჩამოიშალა და ორი მუშა მოიყოლა. მომხდარიდან ცოტა ხნის შემდეგ მიწის ქვეშ მოყოლილი ერთი მუშა დაღუპული იპოვეს, მეორე მამაკაცის ცხედარს კი, რამდენიმესაათიანი ძებნის შემდეგ მიაკვლიეს.