ჭავჭავაძის გამზირზე, სადაც შრომითი უფლებების დაცვის მოთხოვნით აქცია მიმდინარეობს, სამართალდამცველებმა რამდენიმე ადამიანი დააკავეს.

წინასწარი ინფორმაციით, დაკავებულები არიან ცოტნე ცხვედიანი, გიორგი კობახიძე, გიორგი სოფრომაძე, ვახუშტი მენაბდე და დავით სუბელიანი.

აქციაზე ვითარება მას შემდეგ დაიძაბა, რაც დემონსტრანტებმა გზის მეორე ნაწილის გადაკეატვაც სცადეს, რისი უფლებაც სამართალდამცველებმა არ მისცეს. ამის შემდეგ აქციის მონაწილეებმა იმ შენობის ფასადი დააზიანეს, სადაც გუშინ სამშენებლო სამუშაოებისას მიწის ჩამოშლას ორი მუშა ემსხვერპლა.

მონაწილეებმა უარი განაცხადეს თბილისის მერ კახა კალაძის შეთავაზებაზე, მათ სამუშაო სივრცეში შეხვდეს. დემონსტრანტები აცხადებენ, რომ თუ თბილისის მერს შეხვედრა სურს, მათთან თავად უნდა მივიდეს.

ამ დროისთვის ჭავჭავაძის გამზირზე მოძრაობა შეზღუდულია.

ადგილზე იმყოფებიან არასამთავრობო ორგანიზაციების წარმომადგენლები, ასევე საქართველოს იუსტიციის საბჭოს არამოსამართლე წევრი ანა დოლიძე.

შრომითი უფლებების დაცვის მოთხოვნით აქციის მონაწილეები ჯერ მთავრობის ადმინისტრაციასთან შეიკრიბნენ, ხოლო შემდეგ ჭავჭავაძის გამზირზე გადაინაცვლეს და მოითხოვეს, საქართველოს პრემიერ-მინისტრი მამუკა ბახტაძე, ეკონომიკის მინისტრი გიორგი ქობულია და ჯანდაცვის მინისტრი დავით სერგეენკო მათთან შესახვედრად 23:00 საათამდე მივიდნენ.