საქართველოს პირველი არხი ჯემალ სეფიაშვილის სიმღერის ახალ ვერსიასთან დაკავშირებით განცხადებას ავრცელებს

საზოგადოება - 18:57, 29 Mar, 2019

1233

საქართველოს პირველი არხი ეხმიანება კომპოზიტორ ჯემალ სეფიაშვილის სიმღერის „ვაჩუქოთ ერთმანეთს ტიტები“ ახალი ვერსიის პრემიერასთან დაკავშირებით გავრცელებულ ინფორმაციას.

"21 მარტს პირველი არხის ეთერში ჯემალ სეფიაშვილმა სიმღერის ახალი ვერსიის შესახებ, რომელსაც მხოლოდ მამაკაცი მომღერლები ასრულებენ, განაცხადა: „ვთვლი, რომ ოჯახის სიძლიერე არის მამაკაცი. ქვეყნის სიძლიერე არის მამაკაცი, ქვეყნის დამცველი არის მამაკაცი და სწორედ ამიტომ აი, ეს 25 მამაკაცი იმღერებს ამ სიმღერას“.

ავტორის კომენტარი გამოხატავს მხოლოდ მის მოსაზრებას და არა არხის პოზიციას. საზოგადოებას ვაცნობებთ, რომ საქართველოს პირველ არხზე არ იგეგმება აღნიშნული სიმღერის ან კლიპის პრემიერა, არამედ 9 აპრილის ტრაგედიის 30 წლისადმი მიძღვნილი ღონისძიება-კონცერტის დიდი საკონცერტო დარბაზიდან ტრანსლაცია, რომლის პროგრამასა და შინაარსობრივ ნაწილზე პასუხისმგებელი არის მხოლოდ ღონისძიების ორგანიზატორი.

მოგეხსენებათ, რომ 9 აპრილი განსაკუთრებული თარიღია საქართველოს ისტორიაში, სწორედ ამიტომ, საქართველოს პირველი არხი მაქსიმალურ ყურადღებას დაუთმობს და გააშუქებს ამ მნიშვნელოვანი თარიღისადმი მიძღვნილ ყველა ღონისძიებას."- ნათქვამია განცხადებაში.

შეგახსენებთ, 9 აპრილს საზოგადოებრივ მაუწყებელთან მოქალაქეები საპროტესტო აქციის "ვაჩუქოთ ერთმანეთს ტიტები 17 მოკლული ქალის გარეშე?!" გამართვას გეგმავენ, აქციის ორგანიზატორების განცხადებით, აქციის მიზეზი ისაა, რომ 1989 წლის 9 აპრილიდან 30 წლისთავზე პირველ არხზე ჯემალ სეფიაშვილი სიმღერის „ვაჩუქოთ ერთმანეთს ტიტები“ ახალი ვერსიის გაშვებას აპირებს, რომელშიც მხოლოდ კაცები მღერიან.