"ნაწამები, ნაცემი, დაჭრილი, ხელმოტეხილი და ყურმოგლეჯილია" - ხონის ფსიქიატრიული კლინიკის პერსონალს პაციენტის ცემაში ადანაშაულებენ

შემთხვევა - 18:00, 29 Mar, 2019

2775

60 წლის ქალის ოჯახის წევრები ხონის ფსიქიატრიული კლინიკის მედპერსონალს ფსიქიკური პრობლემების მქონე პაციენტის სიკვდილამდე მიყვანაში ადანაშაულებს.

ისინი "რუსთავი 2"-ს უყვებიან, რომ შუახნის ქალბატონი ფსიქაიატრიული კლინიკიდან ქუთაისის კლინიკაში 17 მარტს გადაიყვანეს, თუმცა ოჯახს ეს ფაქტი დაუმალეს.

პაციენტის და ამბობს, რომ პაციენტის მდგომარეობა უკიდურესად მძიმეა და მას ძალადობის ფაქტი გარეგნულადაც ეტყობა.

„ექიმი მეუბნება,რომ შენი და არის მომაკვდავი, შეერთებულია აპარატზე და თუ ჰყავდა ამ ქალს ვინმე არ ვიცოდითო. ავდივართ ზემოთ და ვხედავ სურათს, ჩემი და არის ნაწამები, ნაცემი, დაჭრილი, ხელმოტეხილი, თვალები თითქმის ამოგდებული, ყური მოგლეჯილი და როგორ ფიქრობთ, ამას ვაპატიებ?“-ამბობს პაციენტის და.

მისი თქმით, რამდენიმე დღის წინ ოჯახი მის მოსანახულებლად მივიდა, თუმცა ექიმებმა მათ უთხრეს, რომ ქალს ჰაერის უკმარისობა ჰქონდა და საავადმყოფოში იმყოფებოდა.

მოგვიანებით, ოჯახის წევრების განცხადებით, მათ თავად კლინიკიდან დაუკავშირდნენ და უთხრეს, რომ მათი ოჯახის წევრი კრიტიკულ ვითარებაში ქუთაისში ერთ-ერთ კლინიკაში იმყოფებოდა.

ოჯახის წევრების ინფორმაციით, 60 წლის ქალი ფსიქიატრიულ კლინიკაში ბოლო ორი წელია მკურნალობს.

როგორც ქუთაისში „ჰოსპიტალ სერვისში“ აცხადებენ, პაციენტის საავადმყოფოში შეყვანისას ფსიქიატრიული კლინიკის წარმომადგენლებმა განმარტეს, რომ ქალმა ზოგი დაზიანება თავად მიიყენა, ზოგიერთი კი თავბრუსხვევის დროს წაქცევისას მიიღო.

თავად კლინიკაში კი „რუსთავი2“-ის გადამღებ ჯგუფს სხვა ინფორმაცია მიაწოდეს. მათი განცხადებით, ქალს ეპილეფსიური შეტევები აწუხებდა, ერთ-ერთი შეტევის დროს დაეცა და დაზიანებები მიიღო.

გამოძიება 126-ე მუხლით დაიწყო,რაც ძალადობას გულისხმობს.