საქართველოს სახალხო დამცველის ნინო ლომჯარიას განცხადებით, აუცილებელია სახელმწიფომ ბოშა ბავშვებს ალტერნატიული ცხოვრება შესთავაზოს.

„ძალიან მალე პარლამენტში ადამიანის უფლებების მდგომარეობის ანგარიშს წარვადგენთ. ამ ანგარიშში ჩვენ ბოშათა და ბოშა ბავშვთა უფლებრივ მდგომარეობაზე გვაქვს გამახვილებული ყურადღება. შემიძლია, დაგიდასტუროთ, რომ ნორმალურ ცხოვრებაში ბოშათა ინტეგრაციის პროცესი ძალიან დაბალია.

თუ ასევე სტატისტიკას შევხედავთ, რაც უფრო მაღალ კლასში გადადიან ბოშა ბავშვები, უფრო მეტად და მკვეთრად მცირდება მათი დასწრების მაჩვენებელი, რაც იმას ნიშნავს, რომ ისინი, ვინც საჯარო სკოლებში ირიცხებიან, მაღალ კლასებში სკოლას მთლიანად ტოვებენ და სავარაუდოდ თავს ქუჩაში ცხოვრებით ირჩენენ.

ჩვენ კონკრეტული მონაცემები და რეკომენდაციები გვაქვს. პრობლემების შესამცირებლად აუცილებელია, სახელმწიფომ იზრუნოს იმაზე, რომ ამ ბავშვებს ალტერნატიული ცხოვრება შესთავაზოს. ბოშათა საზოგადოებაში ინტეგრაციის კუთხით სახელმწიფოს პოლიტიკა ძალიან სუსტია“, – განაცხადა ნინო ლომჯარიამ.