მეტროსადგურ „გოცირიძის“ ხიდის დაზიანებული ბურჯები - საზოგადოება აღნიშნულზე აქტიურად ალაპარკდა, რადგან მატარებლები გოცირიძე-დიდუბეს შორის ძალიან ნელა მოძრაობენ, ასევე შეუიარაღებელი თვალითაც კი შესამჩნევია ბურჯებზე ბზარები.

მიუხედავად ამისა, თბილისის მერიაში აცხადებენ, რომ შემოწმების შემდეგ ხარვეზები არ დადასტურდა:

„უშუალოდ ამ ხიდთან დაკავშირებით კომპეტენტური და კვალიფიციური ექსპერტების მიერ შემოწმება დაახლოებით ორი თვის წინ მოხდა. ხიდზე ავარიული ფაქტორები არ დადგენილა. თუმცა, იქ გარკვეული საკომუნიკაციო ქსელების პრობლემაა. სანიაღვრე და წყალარინების ქსელის, როგორც „ჯორჯიან ვოთერ ენდ ფაუერის“, ასევე მუნიციპალური. ორივეს რეაბილიტაცია უკვე დაგეგმილია. ამ ეტაპზე მეტროს მატარებლის მიერ ამ მონაკვეთზე სიჩქარის შენელება ხდება. თუმცა, ვიბრაციები და ბურჯების ჯდომის ნორმები აბსოლუტურად ნორმაშია. ეს კვალიფიციური ექსპერტების მიერ დადასტურებულია. შესაბამისად, ამ ხიდის ავარიულობას ვერ დავადასტურებ“, – განაცხადა ირაკლი ხმალაძემ.