"ცხელ წყალში ჩასვითო და უარესი დამართეს... ონკოლოგიურში რომ წავიყვანეთ მითხრეს, შენი შვილი აღარ არის, ორგანიზმი დაწამლული აქვსო"

"ცხელ წყალში ჩასვითო და უარესი დამართეს... ონკოლოგიურში რომ წავიყვანეთ მითხრეს, შენი შვილი აღარ არის, ორგანიზმი დაწამლული აქვსო" - ბათუმში გარდაცვლილი გოგოს დედა

საზოგადოება - 19:25, 22 Mar, 2019

17769

ბათუმში გარდაცვლილი 29 წლის გოგონას, მელანო ფუტკარაძის გარდაცვალებაში ოჯახის წევრები ექიმებს ადანაშაულებენ. გოგონას დედის, ნარგიზ ქათამაძის თქმით,მისი შვილი მუცლის ტკივილებით ბათუმის რეფერალურ საავადმყოფოში მიიყვანეს, სადაც ექოსკოპია გადაუღეს.დედა აცხადებს, რომ ექიმები ვერ მიხვდნენ ტკივილის მიზეზს, სამი დღის შემდეგ საავადმყოფოდან გაწერეს. რის შემდეგაც გოგონას მდგომარეობა გაუარესდა.

პაციენტი მოგვიანებით მწვავე ტკივილებით „მედცენტრში“ გადაიყვანეს, სადაც უთხრეს, რომ ბრმანაწლავი იყო გახეთქილი, რამაც სეფსისი განავითარა და შეუძლებელი იყო გადარჩენა.

ოჯახის წევრები ექიმების უპასუხისმგებლობაზე და არაპროფესონალიზმზე საუბრობენ. ისინი რეფერალური საავადმყოფოს წინააღმდეგ, სასამართლოში სარჩელის შეტანას გეგმავენ.

„ხუთზე მისული ცხრამდე ყურადღება არ მომაქცია არავინ. ექიმს ეძინა ალბათ და ალბათ ვერ გააღვიძეს... მარტო 12 გადასხმა გაუკეთეს და გამატანეს მეორე დღეს გამატანეს შუადღით. ცხელ წყალში ჩასვითო და უარესი დამართეს. დილამდე ველოდეთ და რომ არ გაუარა წავიყვანეთ ონკოლოგიურში. მითხრეს, შენი შვილი აღარ არის უკვეო, მთელი ორგანიზმი დაწამლული აქვს, სამი დღეა გამსკდარია ამის ბრმა ნაწლავიო,“ - ამბობს გარდაცვლილის დედა.

ოჯახის ბრალდებებს არ იზიარებენ საავადმყოფოში.

„მეორე დღესვე მდგომარეობა გაუმჯობესდა და პაციენტი დამაკმაყოფილებელ პირობებში სამედიცინო რეკომენდაციებით გაეწერა ბინაზე. ხელთ გაიცა ფორმა 100, სადაც მითითებული არის ის რეკომენდაციები და იმ კონსულტაციების აუცილებლობა, რომელიც პაციენტს მდგომარეობიდან გამომდინარე ესაჭიროებოდა. დიაგნოზი - მწვავე მუცელი, ჩვენს კლინიკაში დაფიქსირებული არ ყოფილა,“ - განაცხადა საავადმყოფოს წარმომადგენელმა.