ტაქსის მძღოლების აქცია თბილისის მერიასთან - მძღოლები დედაქალაქის მერთან, კახა კალაძესთაბ შეხვედრას მოითხოვენ. აქციის მონაწილეები იმ რეგულაციებს აპროტესტებენ, რომელიც მანქანების თეთრად გადაღებვას და ტექდათვალიერების წელიწადში ორჯერ გავლას გულისხმობს.

"მანქანები გვყავს ლიზინგით, არ გვაქვს შეღებვის უფლება და ქალაქში ტაქსი არის 80% ამ მდგომარეობაში, ამიტომ ვითხოვთ, გაგვანებონ თავი. ხარჯებთან არის დაკავშირებული ეს ყველაფერი,"-ამბობს ტაქსის მძღოლი გიორგი ბერიკაშვილი.

”საქართველოში სოციალურად დაუცველ მოქალაქეთა უფლებების კომიტეტის” პრეზიდენტის განცხადებით, დედაქალაქის მერს კონკრეტული გეგმა აქვს. მამისა ჯაფარაშვილი ამბობს, რომ კალაძე მისთვის მისაღები ტაქსის კომპანიის შემოყვანას აპირებს.

"ვიცით რა ნაღმი არის ჩადებული. ერთბაშად რომ უთხრას ქალაქის მერმა, რომ თქვენ ტაქსისტებმა თავი უნდა დაანებოთ და მარტო ჩვენი ტაქსები უნდა შემოვიყვანოთ, მაშინ ეს ხალხი შეიძლება აუჯანყდეს. ამიტომ ისეთი რეგულაცია შემოდის, რომ თანდათან დაანებებინებს თავს და ამ ბიზნესსაც ხელში ჩაიგდებენ,"-ამბობს ჯაფარაშვილი.