გადაუღებელი წვიმების შედეგად სოჭში გუშინ საგანგებო მდგომარეობა გამოცხადდა, ქალაქში მოსახლეობის ნაწილის ევაკუაცია დაიწყო.

წვიმა ღამის განმავლობაშიც გრძელდებოდა. პრობლემები, ძირითადად, კალაპოტიდან გადმოსულმა მდინარე სოჭმა შექმნა.

რუსი ბლოგერები სოჭში გადაღებულ ფოტოებს ავრცელებენ და წერენ, რომ როგორც ჩანს, ის 50 მილიარდი დოლარი, რომელიც, ოფიციალური მონაცემებით, უკვე დაიხარჯა სოჭის ზამთრის ოლიმპიადის ობიექტების ასაშენებლად, საკმარისი არ გამოდგა, რადგან გზები და ნაგებობები მზად არ აღმოჩნდა შემოდგომის წვიმის სეზონისთვის.

სოჭში დატბორილია გზები და პარალიზებულია მოძრაობა, მათ შორის, ოლიმპიურ პარკთან მისასვლელი გზაც თითქმის მთლიანად დაფარა წყალმა, რაც კარგად ჩანს რუსი ბლოგერების ფოტოებზე, რომელსაც „ნიუპოსტი“ გთავაზობთ.