ფოთში 8 წლის ბიჭს დენმა დაარტყა - მოზარდის მდგომარეობა მძიმეა

შემთხვევა - 10:03, 12 Mar, 2019

1556

ფოთში, 8 წლის ბიჭს დენმა დაარტყა. მოზარდი მძიმე მდგომარეობით, კატასტროფის ბრიგადამ თბილისში, დამწვრობის ცენტრში გადმოიყვანა.

ბიჭუნა სავარაუდოდ, 9 აპრილის ხეივანზე, ერთ - ერთი კორპუსის ეზოში მდებარე სატრანსფორმატორო ქვესადგურზე აძვრა რა დროსაც უბედური შემთხვევა მოხდა.

,,ენერგო-პრო ჯორჯიას“ მთავარი ინჟინერი ზურაბ ზალოგინი აღნიშნავს, რომ ქვესადგურზე უსაფრთხოების ნორმა დაცულია.

“ადგილობრივებს სატრანსფორმატორო ქვესადგურიდან ბავშვის ხმა გაუგიათ, გაუტეხავთ კარები და გამოუყვანიათ მოზარდი. აქ უსაფრთხოების ნორმები დაცული იყო. ბავშვი ალბათ ზევით აცოცდა და ჩაძვრა, იქ, სადაც პატარა ადგილი იყო ღია,“- თქვა ,,ენერგო-პრო ჯორჯიას“ მთავარმა ინჟინერმა.

დაშავებულს პირველადი დახმარება ადგილზე გამოძახებულმა სასწრაფო დახმარების ექიმებმა აღმოუჩინეს. მათი თქმით, ბავშვს სხეულის ვრცელი მიდამოს დამწვრობა აღენიშნებოდა.

“მდგომარეობა მძიმეა, მიღებული აქვს მეორე-მესამე ხარისხის დამწვრობა,“- განაცხადა სასწრაფოს მორიგე ექიმმა ლალი დემანიამ.

„ევექსის“ ფოთის ჰოსპიტალის დირექტორი ამბობს, რომ პაციენტს სხეულის 60% აქვს დაზიანებული.

“112-ის ბრიგადის მიერ შემოყვანილ იქნა 8 წლის მოზარდი, საკმაოდ კრიტიკულ მდგომარეობაში, აღენიშნებოდა შოკი. სხეულის მესამე-მეოთხე ხარისხის დამწრობითი დაზიანება, სხეულის 60%-ის დაზიანებით. ჰქონდა სუნთქვის მწვავე უკმარისობა. ბავშვი მართვით სუნთქვაზე იყო გადაყვანილი. ჩაუტარდა ყველა საჭირო მკურნალობა და კვლევა, რის შემდეგაც სასწრაფო წესით, გარეფერალდა თბილისის შესაბამისი პროფილის კლინიკაში” თქვა „ევექსის“ ფოთის ჰოსპიტალის დირექტორმა თეა მიგინეიშვილმა.