ქუთაისის მერიის წინ თერჯოლის რაიონის სოფელ ჭოგნართან რეგიონული ნაგავსაყრელის მშენებლობა კიდევ ერთხელ გააპროტესტეს. ადგილობრივი სოფლებიდან ჩამოსული მოსახლეობა აქციას უკვე მეექვსედ მართავს.

მათ ეჭვი აქვთ, რომ დასკვნა, რომლის საფუძველზეც ხელისუფლებამ ნაგავსაყრელის მოწყობის გადაწყვეტილება მიიღო, გაყალბებულია.

ადგილობრივები ნაგავსაყრელის მშენებლობას რამდენიმე მიზეზით ეწინააღმდეგებიან. ისინი განმარტავენ, რომ თავს ძირითადად მეცხოველეობით ირჩენენ და ამ ტერიტორიას საძოვრებად იყენებენ.

მოსახლეობა ხელისუფლებას ქუთაისში ტექნოლოგიური უნივერსიტეტის მშენებლობის დანაპირებს ახსენებს და ამბობს, რომ საერთაშორისო უნივერსიტეტიდან 1 კილომეტრში რეგიონული ნაგავსაყრელი პრობლემებს, ქუთაისის იმიჯსაც შეუქმნის. მოსახლეობის პროტესტს ადგილობრივი ოპოზიციაც იზიარებს.

თერჯოლის რაიონის სოფელ ჭოგნარში ნაგავსაყრელი მშენებლობა უახლოეს პერიოდში უნდა დაიწყოს. ადგილობრივი მცხოვრებლები ამბობენ, რომ თუ ხელისუფლებას აზრი ასეთი აქციებით ვერ შეაცვლევინეს, მზად აქვთ კარვები, გაშლიან, შიმშილობას დაიწყებენ და სამუშაოდ შესულ ტექნიკას ხელს შეუშლიან.