"ჩემი წინაპრების ძვლებიც ამოყარეს" - რუისელები ერთმანეთს უპისრისპირდებიან

საზოგადოება - 18:26, 07 Mar, 2019

1739

ქარელის მუნიციპალიტეტის სოფელ რუისის მოსახლეობა ერთმანეთს უპირისპირდება. „ნიუპოსტის“ კორესპონდნეტის ცნობით, მიზეზი, სოფლის ორ უბანში, ტაძრების მიმდებარე ტერიტორიების რეკონსტრუქციაა. როგორც ადგილობრივების ერთი ნაწილი ამტკიცებს, ე.წ. წინუბანში წმინდა კვირიკესა და გალავანში წმინდა დემეტრეს სახელობის ეკლესიების შემოსაზღვრასა და სამონასტრო კომპლექსებად გადაქცევას, წინაპრების საფლავები შეეწირა. მათი აზრით, ეპარქიას შესაძლებლობა ჰქონდა, მონასტრებისთვის თავისუფალი ტერიტორიები გამოეყენებინა, თუმცა ეს არ გააკეთა.

„საფლავების ამოყრა როგორ შეიძლება?! ცოტა ტერიტორიაა ასათვისებელი? თუ აშენება უნდოდათ რაღაცის, გადასულიყვნენ და მინდორზე აეშენებინათ. იქ ჩემი წინაპრებიც იყვნენ დაკრძალულები და იმათი ძვლებიც ამოყარეს.“-აცხადებს ვანო ბალიაშვილი.

რუისის მცხოვრებთა ერთი ნაწილი თვლის, რომ რუის-ურბნისის ეპარქია მრევლის სულიერ სიმტკიცეზე ზრუნავს, რის ნათელ მაგალითადაც ახალ მონასტრებს ასახელებენ. ეს ადამიანები ირწმუნებიან, რომ ტერიტორიის გალამაზების გარდა, ტაძრები მოქმედი გახდა და მიმდებარე ტერიტორიაზე მცხოვრებლებმა წირვებზე სირული დაიწყეს.

„მოვა დრო რომ აქ ჩემი საფლავიც აღარ იქნება, უნდა ვიფიქროთ მომავალ თაობაზე. თუ პრეტენზიები აქვთ, მაშინ მოსულიყვნენ და წინაპრების ძვლები ერთად შეეგროვებინათ და გადაესვენებინათ.“-აცხადეებს მაია ნაცვლიშვილი.

მოსახლეობის დაპირისპიების მიზეზებზე არ საუბრობენ ქარელის ეპარქიაში. სამონასტრო კომპლექსის გაშენება რუისში 4 წლის წინ დაიწყო. მოსახლეობამ სასულიერო პირების მიმართ უკმაყოფილებია მას შემდეგ გამოხატა, რაც ტრაქტორი მუშაობას სასაფლაოს ტერიტორიაზე შეუდგა. ხალხი ამბობს, რომ საქმის კურსში არაერთი უწყება ჩააყენეს, თუმცა, საძვალეების გადარჩენა ვერ შეძლეს. ბოლო პერიოდში კი, ხალხი ორად გაიყო და აზრთასხვადასხვაობის გმო სოფელში სიტუაცია კიდევ უფრო დაიძაბა.