"შემომივარდნენ, დამაგდეს, ერთმა ფეხი დამაჭირა ზურგზე და ერთი კი თავში მირტყამდა"- 14 წლის ბიჭი კერძო დაცვის თანამშრომლებს ძალადობაში ადანაშაულებს

შემთხვევა - 09:37, 26 Feb, 2019

1654

14 წლის მოზარდის თქმით, მოსკოვის გამზირზე სამართალდამცავებმა სცემეს. მისი თქმით, ორმა პოლიციელმა მას ჯერ თავში ურტყა, შემდეგ კი მათრახი გამოიყენეს.

არასრულწლოვანი აღნიშნავს, რომ ადგილზე სხვა ეკიპაჟიც მოვიდა, მათ მოძა;ლადე პოლიციელებმა უთხრეს, რომ მოზარდმა დაზიანებები დაცემის შედეგად მიიღო.

მოზარდს დაზიანებები სახის არეში გარეგანი დათვალიერების შედეგადაც ეტყობა.

"პოლიციელები შემომივარდნენ და დამაგდეს ძირს. ერთმა ფეხი დამაჭირა ზურგზე და ერთი კი თავში მირტყამდა. მათრახი ეჭირა ხელში. ბევრნი, რომ მოვიდნენ ამაყენა და უთხრა, რომ წაიქცაო. იქ ჩემი სისხლი ესხა. ექსპერტები, რომ მოვიდნენ, ყველაფერი გააკეთეს და გადამიყვანეს განყოფილებაში, განყოფილებიდან კი გამომიშვეს მერე სახლში,"-აცხადებს არასრულწლოვანი.

ფაქტის გადასამოწმებლად შინაგან საქმეთა სამინისტროს დავუკავშირდით, სადაც განმარტავენ, რომ მოსკოვის გამზირზე მდებარე ერთ-ერთ სპორტულ დარბაზში ქურდობის ფაქტი მოხდა, რაც იქვე მდებარე ობიექტის კერძო დაცვის თანამშრომლებმა შენიშნეს. გაირკვა, რომ არასრულწლოვანს მიმალვისას ობიექტის კერძო დაცვის თანამშრომლებმა ფიზიკური შეურაცხყოფა მიაყენეს.

ადგილზე მისულმა სამართალდამცველებმა ქურდობის ფაქტთან დაკავშირებით გამოძიება სისხლის სამართლის კოდექსის 177-ე მუხლით დაიწყეს, ხოლო ცემის ფაქტზე 126-ე მუხლით, რაც ძალადობას გულისხმობს. ფაქტთან დაკავშირებით აქტიური საგამოძიებო მოქმედებები მიმდინარეობს.