ბიჭი, რომელსაც ყველა ფერი უყვარს - 128-ე სკოლაში 7 წლის მხატვრის, გეგა მესხის ნახატების გამოფენა გაიმართა (ფოტოები)

საზოგადოება - 19:10, 15 Feb, 2019

4854

პატარა გეგა მესხისთვის დღეს გამორჩეული დღე იყო. მან თავისი მე-7 დაბადების დღე გამორჩეულად აღნიშნა, სკოლაში მისი ნახატების გამოფენა გაიმართა. თბილისის 128-ე საჯარო სკოლაში, გამოფენაზე წარმოდგენილი იყო გეგას სხვადასხვა ასაკში შექმნილი ნახატები.

გეგა ხატვით 2 წლის ასაკიდან დაინტერესდა, 4 წლისამ კი უშანგი ლონდარიძის სამხატვრო სახელოსნოში დაიწყო სწავლა. სწორედ მასწავლებლის დახმარებით მოხვდა გეგას ნამუშევრები არაერთ გამოფენაზე და სიგელებიც დაიმსახურა.

2018 წელს გამომცემლობა „ლომარმა“ წიგნი „ნიჭიერი თაობა“ გამოსცა, სადაც გეგას ნამუშევრებიც შევიდა.

„ნიუპოსტი“ გამოფენას დაესწრო და პატარა მხატვართან გასაუბრებაც შეძლო. კითხვას, რომელი ფერი უყვარს ყველაზე მეტად, გეგა ჭეშმარიტი მხატვარივით პასუხობს და ამბობს, რომ ყველა.

გეგას თქმით, ყველაზე მეტად ზღვის პეიზაჟების ხატვა უყვარს, თან „გემები რომ არიან ზღვაში“ ისეთის.

პატარა მხატვარი სიტყვაძუნწი აღმოჩნდა, სამაგიეროდ ხელოვნებაზე და მოსწავლეებზე საუბარი არ ბეზრდება მის ხატვის მასწავლებელს.

უშანგი ლონდარიძე უკვე 8 ათეულ წელსაა გადაცილებული და ამ წლების განმავლობაში, მან არაერთ ადამიანს შეაყვარა ხელოვნება და თუ ყველა მხატვრად არ ჩამოყალიბდა, ხელოვნების დამფასებლები ნამდვილად არიან.

„ყველა ადამიანმა თავისი საქმე უნდა აკეთოს, ჩემი საქმეა აღზრდა, მთავარია ბავშვი ადამიანად აღზარდო, დაეხმარო განვითარებაში, შეაყვარო სამშობლო და ხელოვნება, მერე ის მხატვარი გახდება, მწერალი, მუსიკოსი თუ ფილოსოფოსი მისი საქმეა. ბავშვის ტვინი სუფთა და წკრიალაა და მას სწორი ღირებულებები უნდა ჩამოუყალიბო.“- აღნიშნა უშანგი ლონდარიძემ.

გეგას გამოფენას მისი სკოლის მეგობრები, ბაღისა და სკოლის პედაგოგებიც ესწრებოდნენ. გამოფენაზე მისულმა სტუმრებმა პატარა მხატვარს სამახსოვრო რვეულში სურვილებიც ჩაუწერეს და წარმატებები უსურვეს.