ილიას უნივერსიტეტი კიდევ ერთმა ლექტორმა, მაია სიდამონიძემ დატოვა

საზოგადოება - 10:17, 13 Feb, 2019

1389

ილიას უნივერსიტეტი კიდევ ერთმა ლექტორმა დატოვა. საქართველოს ტურიზმის დეპარტამენტის ყოფილი უფროსი, ბიზნეს სკოლის ტურიზმის ცენტრის ხელმძღვანელი მაია სიდამონიძე ამის მიზეზად რესტრუქტურიზაციას ასახელებს. სიდამონიძის თქმით ის კატეგორიულად არ ეთანხმება იმ სტრუქტურულ ცვლილების შინარსსა და ფორმას, რაც მათ ფაკულტეტზე განხორციელდა:

“დღეს ხარისხიანი განათლება ყველაზე მნიშვნელოვანი გამოწვევაა ქვეყანაში. სწორედ ამ მიზეზით, ერთი წლის წინ შევუერთდი გიორგი ქადაგიძის გუნდს ილიას სახელმწიფო უნივერსიტეტში. მე სრულიად ვიზიარებდი მის გეგმებსა და ხედვას, რაც ჩემთვის დიდი მოტივაცია და იმედი იყო, რომ ჩვენ ერთად შევცვლიდით ბევრ რამეს უკეთესობისკენ მიუხედავად იმისა რომ კარგად ვაცნობიერებდი მოსალოდნელ ბიუროკრატიულ დაბრკოლებებს. ერთი წლის განმავლობაში ჩვენ სრულიად განვაახლეთ საბაკალავრო და სამაგისტრო პროგრამები ტურიზმში, განვაახლეთ ლიტერატურა და მოვიწვიეთ ინდუსტრიაში წარმატებული პრაქტიკოსი ლექტორები. თუმცა ეს ყველაფერი ჩემთვის პირადად არ იყო ადვილი, არამარტო უნივერსიტეტში არამედ მთლიანად განათლების სექტორში არსებული არასაჭირო და ზედმეტი ბიუროკრატიული პროცესების გამო. მომავალი გეგმები უფრო დიდი იყო მაგრამ მე ამ ყველაფრის ნაწილი ვეღარ ვიქნები რადგან გადავწყვიტე დავტოვო ტურიზმის ცენტრის ხელმძღვანელის პოზიცია ილიას სახელმწიფო უნივერსიტეტში. მე კატეგორიულად არ ვეთანხმები იმ სტრუქტურულ ცვლილების შინარსსა და ფორმას, რაც ჩვენს ფაკულტეტზე განხორციელდა. ეს ყველაფერი პირველ რიგში მეტყველებს ამ სფეროში უფრო სიღრმისეულ პრობლემებზე ვიდრე წარმომედგინა, სადაც ჩვენი მომავალი თაობის ინტერესი და კეთილდღეობა ზიანდება. მე დიდი მადლობა მინდა გადავუხადო Giorgi Kadagidze გამოცხადებული ნდობისთვის, ასევე სტუდენტებსა და ლექტორებს თანამშრომლობისთვის.”- წერს მაია სიდამონიძე ფეისბუკზე.