გაათავისუფლეს თუ არა სასულიერო სემინარიიდან პროფესორი გოჩა ბარნოვი - გუშინ გავრცელდა ინფორმაცია იმის შესახებ, რომ ბარნოვის სემინარიიდან გაშვების მიზეზი უკრაინისი ეკლესიის ავტოკეფალიის მხარდამჭერი განცხადებები გახდა. თავად ბარნოვმა სოციალურ ქსელში დაწერა, რომ აღნიშნული მხოლოდ მიზეზი იყო, რეალურად კი მისი გათავისუფლება უკავშირდება სტუდენტების საზღვარგარეთ გაშვების ფაქტს.

მომხდარს სასულიერო სემინარიის ლექტორი მამა ბიძინა გუნია გამოეხმაურა და განაცხადა, რომ ბარნოვი ჯერჯერობით არ გაუთავისუფლებიათ და არასწორი ინფორმაცია ვრცელდება:

„გადაწყვეტილება მიღებული არ არის და ვრცელდება ცრუ ინფორმაცია, თითქოს ბატონი გოჩა გაათავისუფლეს სასულიერო აკადემიიდან, თითქოს მას შეუწყვიტეს ლექტორობა... შეგვიძლია ვთქვათ, რომ საბჭოზე მოსმენილი ეს და სხვა ინფორმაცია ერთმნიშვნელოვნად უარყოფითად იყო შეფასებული საბჭოს წევრების მიერ... ის არავის არ გაუთავისუფლებია, საბჭოზე გამოითქვა უარყოფითი პოზიცია და დამოკიდებუკლება მისი განცხადებების გამო, თვითონ საბჭოს არ ესწრებოდა, თუმცა იყო მოწვეული საბჭოზე," - ამბობს მამა ბიძინა.