"სხვის ოჯახში ვერ ჩავერევი"- რას ამბობენ შვილის გაუპატიურების საზარელ ფაქტზე ბრალდებული მამის მეზობლები

საზოგადოება - 17:22, 05 Feb, 2019

10719

გორის მუნიციპალიტეტში მომხდარი საზარელი ფაქტის დაჯერება უჭირთ, 39 წლის მამაკაცის მეზობლებს, რომელმაც გამოძიების ცნობით, 14 წლის შვილი გააუპატიურა.

მეზობლები დაკავებულს "მშრომელ ბიჭს" უწოდებენ. მათი თქმით, ოჯახიდან ჩხუბისა და დაპირისპირების ხმა არასდროს გამოდიოდა.

"არასდროს არაფერი გამიგია, წყნარი, კარგი ოჯახი იყო. არავის ერჩოდნენ. გარეთ რომ გამოდიოდნენ ჩვეულებრივი, ნორმალური ოჯახი იყო. ახლა საუბრობენ რაღაცეებს, თვალებზე ცრემლები მადგას. მიჭირს დავიჯერო. გია მშრომელი ახალგაზრდა იყო. სახლში რა ხდებოდა, მე არ ვიცი"- ამბობს ერთ-ერთი მეზობელი.

დაკავებულის კიდევ ერთი მეზობელი აღნიშნავს, რომ "სხვის ოჯახში ვერ ჩაერევა".

"მე ჩემი ოჯახი მაქვს, იმას თავისი. ჩემს ოჯახში, რომ ვიღაც ჩეერიოს არ მინდა, არც მე ვერევი სხვის ოჯახში. მოძალადე არ არის მაგრამ თავში ტვინი არ აქვს"- აცხადებს მამაკაცი.

პოლიციამ ბრალდებული დღეს დააკავა. შს სამინისტროში ამბობენ, რომ დაკავებული ჩადენილ დანაშაულს აღიარებს.

უწყების ცნობით, გამოძიებამ დაადგინა, რომ ბრალდებულმა 2017 წელს, საკუთარ საცხოვრებელ სახლში, 14 წლის შვილის მიმართ სხვადასხვა დროს სექსუალური ხასიათის ძალმომრეობითი ქმედება განახორციელა.
საგამოძიებო უწყების ცნობით, სისხლის სამართლის საქმეზე ჩატარებული არაერთი საგამოძიებო და საპროცესო მოქმედების შედეგად მოპოვებული მტკიცებულებებით დასტურდება დაკავებულის მიერ აღნიშნული ქმედების ჩადენა.

ამ დროისთვის, არასრულწლოვანი გოგონა სოციალური სააგენტოს თანამშრომლების მიერ უკვე გადაყვანილია სოციალური მომსახურების სააგენტოს საოჯახო ტიპის სახლში.